Hêzên Pêşmerge ku sê roj in li ser sînorê Kobanê tên ragirtin, ber bi Deriyê Sînor ê Murşîtpinarê ve bi rê ketin. Pêşmerge li gel çek û cebilxaneyên bi xwe re anîbûn ber bi Kobanê ve bi rê ketin û dirûşmên “Bijî Kobanê” gotin.

Hêza Pêşmergeyan a ji 160 kesan pêk tê, ku beriya sê rojan ji Başûrê Kurdistanê bi rêya hewayî û bejahî gihiştin Rihayê, sê roj in li ser sînorê Kobanê di depoya Çukobîrlîkê de tên rawestandin, ber bi Deriyê Sînor ê Mûrşîtpinarê ve bi rê ketin. Beriya pêşmerge bi rê bikevin tedbîrên ewlekariyê hatin berfirehkirin.  Endamên tîmên taybet li derdora Depoya Çukobîrlîkê hatin bicihkirin û nehiştin çapemenî dîmenan bigirin.

Hêzên pêşmerge li gel çek û cebilxaneyên bi xwe re anîn, ber bi Deriyê Sînor ê Mûrşîtpinarê ve bi rê ketin. Hate dîtin ku moralê pêşmergeyan baş û alên Herêma Kurdistanê vekirin û dirûşmên, “Bijî Pêşmerge”, “Bijî Kobanê” û “Kobanê Azad Dibe” qîriyan. Balkêş bû ku serê wesayîtên ku çekên giran li ser bûn bi temamî hatibûn vekirin.