Hevserokatiya Konseya Rêveber a KCK’ê, diyar kir ku siyaseta dewleta AKP’ê ya Kobanê û Rojhilata Navîn hilweşiyaye. KCK’ê da zanîn ku polîtîkayên li ser dijminiya Kurd pêş dixînin encamê nadin û wiha got: “Bi pêkanînên faşîzan-yekparêz civakê her roj dikin aloziyê. Daxuyaniya Cîgirê Serokwezîr Bulent Arinç a ‘Em ne mahkumê pêvajoyê ne’ niyeta AKP’ê ya rast careke din derxistiye holê."

KCK’ê ji bo malbata Salîh Yigît ê ku li Sîlopiyayê Şirnexê ji aliyê polîsên AKP’ê ve hate qetilkirin, sersaxî xwest û hat gotin ku Yîgît ji aliyê polîsên AKP’ê ve hedef hatiye girtin û qetilkirin. KCK’ê da zanîn ku divê AKP baş bizane ku gelê Kurd, dostên wan û hêzên li ber xwe didin li dijî zilm û zextan wê tu car serî netewînin û wiha pêde çû: “Divê her êrîş bi serhildanên radîkal û heybet bê pêşwazîkirin. Cenazeyê Yîgît dê li gorî layîqbûnê ji aliyê hezaran ve xwedî lê derkeve.

Hevserokatiya Konseya Rêveber a KCK’ê daxuyaniyek nivîskî da û da zanîn ku polîtîkaya AKP’ê ya Kobanê û Rojhilata Navîn têk çûye û hat gotin ku polîtîkayên li ser dijminahiya Kurdan tên meşandin encam nedaye û ji ber vê yekê hikûmeta AKP’ê çavsor bûye û li Kurdistanê qirkirina siyasî zêde kiriye.

KCK’ê di berdewamiya daxuyaniyê de wiha got: “Bûyerên girtin, binçavkirin û îşkenceyê her diçin zêde dibin. Dewleta AKP’ê tehemulî têkoşîna û bertekên dmeokratîk nake. Pêkanînên zîhniyeta yekparêz-faşîzan civakê dike nava aloziyê û pêvajoyeke pevçûnê pêş dixe. Berdevkê hikûmetê Bulent Arinç dibêje em ne mahkumê pêvajoyê û niyeta AKP’ê ya rast careke din derxistiye pêş. Hikûmeta AKP’ê tu carî li gorî ruhê pêvajoyê tevnegeriyaye. Yekane armanca wê ev e ku polîtîkayên di neçareseriyê de israr dike pêş bixe.

Pêvajoya ku ji aliyê Rêber Apo ve bi sebr û hewldaneke mezin hatiye afirandin, ji aliyê AKP’ê ve vala hatiye derxistin û qedandin. Ev zîhniyeta faşîzan careke din gotiye ku em ne mecburê çareseriyê ne. Serhildanên gelê me bi qirkirin û komkujiyan hatiye çewisandin. Herî dawî li Sîlopiyayê welatiyê Kurd ê bi navê Salîh Yigît ji aliyê polîsan ve hatiye qetikirin. Divê AKP vê baş bizane ku gelê Kurd, dostên wan û hêzên berxwedêr wê li dijî zilmê serî netewîne û bi serhildanan bersivê bide van. Bi vê wesîleyê em li pêşberî bîranîna Salîh Yîgît rêzdar in û ji bo malbat û gelê xwe sersaxiyê dixwazin. Divê bi 10 hezaran xwedî li cenazeya Yîgît derkevin.”