Bi sedan welatiyên  Kantona Efrînê li pêşiya Nexweşxaneya Avirîn kom bûn û cenazeyê şervanê YPG′ê Ebdulqadir Miho (Êrîş Efrîn) wergirtin. Girseya gel piştî wergirtina cenaze ber bi goristana Şehîd Refîq a li gundê Metîna ya navçeya Şera ve ketin rê.

Li goristanê ji aliyê şervanên YPG/YPJ’ê ve merasîmeke leşkerî hate lidarxistin. Piştre Fermandarê YPG′ê Dilxwaz Efrîn axivî, sersaxî ji malbata şehîd Êrîş re xwest û bal kişand ser berxwedana gelê Efrînê ya li hember komên çete û dagirkeriya Tirk.

Dilxwaz bi navê YPG′ê soza tolhildanê û şopandina rêya şehîdan ya heta avakirina Sûriyeke Federal da.

Piştre Endama Rêveberiya Meclîsa Malbatên Şehîdan Meryem Henan û bi navê Rêveberiya Xweser Nûrî Şêxo axivîn, sersaxî ji malbata têkoşer re xwestin û soza şopandina riya şehîdan dan.

Di dawiyê de nasnameya şehîd hat xwendin, radestî malbata wî hat kirin û cenazeyê wî  bi dirûşmeyên ‘Şehîd Namirin’ û tilîliyên dayîkan li goristanê hate veşartin.