Baskê pêşî yê meşa Zapatîstayan ku ji pênc parzemînan dane destpêkirin gihaşte parzemîna Ewropayê. Rawestgeha pêşî ya delegasyonê bû Viyana û rawestgeha duyan bû Frankfûrt.

Par 5'ê Cotmehê Tevgera Zapatîsta (EZLN-CCIG) bi danezana ''Li Deryaya Vekirî Çiyayek'' ragihandibû ku ji Nîsana 2021'an û pê ve wê delegasyonÊn Zapatîsta bişînin pênc parzemînan û delegasyona pêşî 13'ê Tebaxa 2021'an wê ji Madîrê bi rê bikeve.

Endamê Meclîsa NCKD (Navenda Civaka Kurd a Demokratîk ) a Frankfûrtê Ercan Ayboga got NCKD a Frankfûrt û pêkhateyên Meclîsa Civaka Azad wê Zapatîstayan bikin mêvan.

Ayboga ji Medya Haberê re axivî û got, ''Li gel gelek rêxistinên çepgir ên Elman pêkhateyên NCKD a Frankfûrtê jî wê milîtanên Zapatîstan pêşwazî bikin, em ê hewl bidin ji wan re bibêjin ku xalake me ya hevpar heye û bi salan e ji bo eynî armancê têdikoin.''

Ayboga got, ''Zapatîsta ji bo me girîng e. Ji ber ku fikrên me ji hev ne cihê ye. Ji vî alî ve ya wan xweseriyeke fiîlî heye û pratîk heye,  weke Kurdistanê xwedi pratîkeke şoreşger in. Em pêkhateyên NCKD'yê vê heftiyê 3 caran bi milîtanên Zapatîsta re werin cem hev.''

Ayboga diyar kir ku 23'yê Îlonê (îro) enternasyonalîstên nêzî tevgera Kurd wê bi milîtanên Zapatîsta re bicivin û Konfederalîzma Demokratîk gotebêj bikin û saet 19:30'an jî li saziya EXZESS'ê Kurd û milîtanên Zapatîsta wê bêne cem hev, di komûnê de wê Civaka Azad û pêkhateyên NCKD ya Frankfûrtê hebin û her wiha 24'ê Îlonê jî Meclîsa Jinan a Kurd a Amarayê jî bi wan re kom bibe.

Ayboga herî dawî diyar kir 16'ê Cotmehê bi tevlêbûna ji hemû deverên Elmanyayê li Franfûrtê wê meşeke mezin û girseyî were kirin, di vê meşê de wê milîtanên Zapatîsta jî hazir bin û armanca sereke ya vê meşê wê protestokirina BAF'ê be, ku BAF destûrê dide firotina çekan.