Sosyolog, parêzer û nivîskarê Swîsrî, ramanwerekî pêşeng ê çepgirên cîhanê û hevalekî nêzîk ê Tevgera Azadiya Kurd Jean Ziegler çend roj berê jiyana xwe ji dest da. Ji bo Jean Ziegler li Cenevreyê bi beşdariyeke girseyî merasîmek bîranîn û oxirkirinê hat lidarxistin. Merasîma ku li Katedrala dîrokî ya Saint-Pierre hat lidarxistin, siyasetmedar, hunermend, parêzvanên mafên mirovan, nûnerên Neteweyên Yekbûyî û bi sedan kes beşdar bûn.

Yek ji kêliyên herî balkêş ên merasîmê bi orga katedralînê Sirûda Navneteweyî hat lêxistin û piştre jî ji hêla beşdaran ve bi hev re hat gotin. Sirûd yek ji sembola navneteweyî ya tevgera çepgir e wekî nîşanek nirxên ku Jean Ziegler di tevahiya jiyana xwe de parastiye hat dîtin.

Şaredara Cenevreyê Christina Kitsos di merasîma ku katedrala tijî bibû de axivî û bal kişand ser mîrateya ku Ziegler ji bajar û cîhanê re hişt û got, "Cenevre yek ji wijdanên xwe yên herî mezin winda kiriye.” Di axaftinan de gelek caran têkoşîna wî ya li dijî birçîbûn, xizanî û neheqiya kûrewî hat bibîranîn.

MALBATÊ BEHSA ZIEGLER KIR

Hevjîna wî Erica Ziegler, kurê wî Dominique Ziegler û neviyê wî Théo Ziegler di merasîmê de axivîn û behsa Jean Ziegler kirin. Di axaftinan de hat destnîşankirin ku Ziegler ne tenê entelektuelekî têkoşer bû, di heman demê de mirovekî dilovan bû û her gav piştgirî dida kesên nêzîkî xwe.

Kurê wî yê derhêner Dominique Ziegler diyar kir ku bavê wî di tevahiya jiyana xwe de di navenda nîqaşan de bû û got, "Bavê min demekê yek ji kesên herî zêde li Swîsreyê dihat rexnekirin bû. Tevî vê yekê min qet gilî û gazincên wê nebihîst.”

Di merasîma ku du saet û nîvan berdewam kir de bi axaftin, stran û bîranînan  jiyan, raman û têkoşîna Jean Ziegler hat vegotin. Ziegler ê ku li çaraliyê cîhanê bi têkoşîna li dijî birçîbûn, mêtingerî û newekheviyê tê nasîn, wê li Goristana Cimetière des Rois a Cenevreyê were veşartin.