Rûniştina destpêkê ya dozê ku têkildarî hewldana sûîqestê ya li dijî Hevserokê KONGRA GEL Remzî Kartal û endamê Konseya Rêveber a KCK'ê Zubeyîr Aydar hate vekirin, di 1'ê Cotmehê de pêk hat.

Di rûniştina destpêkê ya dozê de ku li Dadgeha Ceza ya Brukselê pêk hat, aliyê hember xwest ku demekê bidin wan.

Dadgehê jî mîna ku di dozên bi vî rengî de gelek caran dike, dema rûniştina dozê taloq kir.

Parêzerê aliyê Kurd Jan Fermon got, "Di vê çarçoveyê de wê bi taybetî argumanên nivîskî bêne wergirtin."

Dadgehê ragihand ku doz wê di 11'ê Adarê de pêk were û mijar ji aliyê esasî ve bê nirxandin. Lê belê ji meha Mijdarê û pê ve wê parastina aliyan werbigire.

Fermon bi taybetî bal kişand ser helwesta dozger û got, "Dozger ji destpêkê ve îdîa dike ku delîlên şênber nîne, ku em di wê nêrînê de nînin. Dadgehê ji xwe qebûl kir ku îdîayên dozger nerast in."

Fermon qetilkirina sê şoreşgerên Kurd li Fransayê bi bîr xist û got, "Me li Fransayê jî dît ku encamwergirtina ji dozên bi vî rengî zehmet e. Dadgerî di hin mijaran de xwe vedigire. Em hêvîdarin ku li Belçîkayê jî wê heman helwest neyê nîşandan."

Têkiliyên berfireh ên tîma kuştinê ya Tirk kete nava îdîanameyê. Çavkaniyên nêzî dosyayê radigihînin ku şopa tîma kuştinê digihêje heta Serokkomarê Tirk Recep Tayyîp Erdogan. DelÎl hene ku nîşan didin, tîma kuştinê bi şêwirmendên Erdogan Seyît Sertçelîk, şefê rêxistina paramîlîter SADAT'ê Adnan Tanriverdî û Sefîrê Bilind ê Tirkiyeyê yê li Fransayê yê berê Îsmaîl Hakki Mûsa re hevdîtin kiriye.