Di 2. Kongreya Awarte ya Rêxistina BDP'ê ya Bajarê Stenbolê de, Emrûllah Bîngul û Arîfe Çinar ji bo Hevserokatiya BDP'ê ya Bajarê Stenbolê hatin hilbijartin.

Di 2. Kongreya Awarte ya Rêxistina BDP'ê ya Stenbolê de, li dû axaftina Hevserokê BDP'ê Selahattîn Demîrtaş, raporên kar û maliyê hatin xwendin. Piştî xwendin û nîqaşa li ser raporan, li ser navê malbatên Roboskî Seyhan Urek mafê axaftinê wergirt û diyar kir ku tevî di ser komkujiyê re 578 roj derbas bûne jî kujer nehatine dîtin û got, "Bi vê komkujiyê re dilê me şewitandin. Êşa di dilê me de hînê weke roja destpêkê ye. Şîna me dewam dike. Eger Serokwezîr Erdogan aştiyê dixwaze, divê berpirsyarên komkujiyê bibîne û darezîne."

Piştî axaftinan li ser yek lîsteyê bi beşdariya 350 delegeyan hilbijartin hat kirin. Dema hilbijartin destpê kir, rayedarên Desteya Bilind a Hilbijartinê gotin heta ku wêneyên Rêberê Gelê Kurd Abdullah Ocalan ê li salonê neyê daxistin, hilbijartin bi awayekî fermî nayê destpêkirin. Li ser nerazîbûna welatiyan, wêneyê Ocalan li cihê xwe ma û hilbijartinê destpê kir. Di encama hilbijartinê de Emrûllah Bîngul û Arîfe Çinar ji bo Hevserokatiya BDP'ê ya Bajarê Stenbolê hatin hilbijartin. Ji bo rêveberiya bajêr jî 24 endam û 24 endamên cîgir, hatin hilbijartin.

Piştî hilbijartinan, kongre bi stranên Koma Agirê Jiyan û govendê, bi dawî bû.