Komîsyona Jinan a Komeleya Huqûqnasan a Ji Bo Azadiyê (OHD) û Komeleya Jinan Rosa li dijî rakirina mafê parêzbendiyê dest bi kampanyaya îmzeyan kir.

OHD û Komeleya Jinan Rosa, di serî de parlamenterên jin ên Partiya Demokratîk a Gelan (HDP), dixwazin ku pêvajoya darazî ya ji bo hilanîna mafê parêzbendiyê ji bo siyasetmedarên jin ên mixelef hatiye destpêkirin, raweste.

Di kampanyaya îmzeyan a bi sernavê “Dest nede mafê hilbijartin û hilbijirînê û mafê kirina siyasetê’’ hat destpêkirin de, berteka ‘’Yên hêza dewletê bi kar tînin, jinên ku hêza avaker a mixelefa civakî ne ji xwe re dikin hedef’’ hat nîşandayîn.

Di metinê kampanyayê de, polîsê ku ji Berdevka Meclîsa Jinan a HDP’ê Ayşe Acar Başaran re got: ‘’Ez bi dîwêr ve bizmar bikim’’ û yê pêçiya xwe ji Hevseroka Giştî ya DBP’ê Salîha Aydenîzê re got: ‘’Ez nahêlim tu bimeşî’’ hatin bibîrxistin.

Di metine kampanyayê de wiha hat gotin: “Şideta fizîkî û devkî ya polîsan, nîşaneya rêbaza rêvebirina mêrane û zarê şidetê yê mîlîtarîst e.’’

Di metin de hat destnîşankirin ku sedema vê bêperwayî û êrîşkariyê ew e ku wan hay jê çêbûye ku astengiya herî mezin a li ber pergala otorîter a gav bi gav datînin Kurd û jin in’’

Di dewama metinê kampanyayê de ev tişt hatin ziman: ‘’Bila ji bîr nebe ku; di demeke ku di pirsgirêka Kurd de pevçûnên biçek berdewam in de, rakirina mafê parêzbendiyê siyasetmedaran, wê ji zêdekirina pevçûnan û neçareseriyê pêştir bi kêrê tu tiştekî neye.’’

Di metin de bal bi ser wê yekê de hat kişandin ku mafê hilbijartin û hilbijartinê nebe demokrasî nabe, di şexsê parlamenterên jin ên Kurd de ev maf tê binpêkirin û hat destnîşankirin ku êrîşa desthilatdariya siyasî li hemû nirxên demokrasiyê û mafên mirovan ên gerdûnî ye.

Di metin de navên parlamenterên jin ên mafê wan ên parêzbendiyê hatiye rakirin, hatine girtin û neçarê bûne ku sirgûn bibin hatin rêz bi rêz kirin û hat bibîrxistin ku çendeyek e pevajoyeke bi heman awayî ji bo Parlamentera Amedê Salîha Aydenîzê jî hatiye amadekirin, pêşniyaz di komisyona jêrîn a meclîsê re derbas bûye û ji bo rakirina mafê parêzbendiyê ji Komîsyona Têkel re hatiye şandin.

Metin bi van gotinan bi dawî bû: ‘’Ji bo xwedîderketina li normên demokratîk, em bang li her kesê dikin ku ji bo bidawîkirina pêvajoya ji bo rabûna mafê parêzbendiyê Parlamentera Amedê Salîha Aydenîzê li Meclîsa Gel a Mezin a Tirkiyeyê dest pê bûye, bibin piştgir ji vî metinê îmzeyan re. Di serî de partiya maka mixelefetê, em bang li hemû partî û parlamenterên di meclîsê de dikin û bi bîr dixin ku  erka wan a sereke derketina xwedî li normên demokratîk e û ji wan dixwazin ji rakirina mafê parêzbendiyê re nebêjin erê.’’

Mirov bi vê lînkê dikarê xwe bigihîne kampanyayê: