Dikandarên sûkê li navenda bajêr li hev civiyan û biryara xerakirinê qeyûm protesto kir û xwest ku dev ji xerakirinê bê berdan.

Serokê sûkê Tûran Tabarû ku di çalakiyê de axivî, got: ‘’Em bi salan e bi bazirganiyê re mijûl in. Ji ber pirsgirêka aboriyê, buhabûna tiştan û betaliyê, rewşa welêt diyar e.’’

Tabarû bi dewamdarî wiha axivî: ‘’Kargehên me ku di van şertan de ji me bên standin, em ê bikevin tengasiyekê ku nekarin ji bin rabibin.

Tabarû da xuyakirin ku hemû dikandarên li sûkê ji bankeyan re deyndar in û wiha got: ‘’Sedema van deynan lêçûn e ku li van kargehan hatiye kirin û alav û amûr in ku hatine kirîn. Dikan ji me bên standin em ê mexdûr bibin. Em nikarin li dereke din jî tu kargehekê vebikin.’’

Tabarû wiha dawî li axavtina xwe anî: ‘’Buhayê ji bo kargehên me hatiye diyarkirin, pir kêm e. Me ji kargehên me bêpar bihêlin, ne ji xêra civakê re ye û ne hiqûqî ye. Daxwaza me ew e ku dev ji xerakirina sûkê bê berdan. Em bi kargehan debara xwe dikin. Qebûl nakin ku ji me bên standin.’’