Di çarçoveya xebatên ji bo bihêzkirina aboriya herêmî de şaredariya Sûrê ya Amedê dest bi çandina tovên sebzeyan kir. Ev xebata şaredariya bi pêşengiya beşên aboriya herêmî û parastina hawîrdorê bi alîkariya kedkarên jin ên şaredariya Sûrê hate destpêkirin. 

Wekîla hevşaredarên Sûrê Azize Deger Kûtlû, alîkara hevşaredaran Naşide Bûlûttekîn û gelek xebatkarên şaredariyê jî tevlî vê xebatê bûn. Bi kedkaran re dest bi çandina tovên sebzeyên wekî firingî, îsot, bacanên reş, Kundir, sebeş, Petêx û Bamya kirin. 

Der barê vê xebatê de şefê beşa aboriya herêmî Veysel Moray nêrînên xwe wiha anînin ziman: "Ji bo bihêzkirina çandiya herêmî, li bajar bi giştî teşwîqkirina karên çandiniyê û derxistina pêş a çandiniyê me bi coşa Newrozê weke destpêk me dest bi xebata çandina tovên sebzeyan kir."

Hêjayî gotinê ye beriya bi demekê dest bi xebatên belavkirina şitlên daran jî hatibû kirin û di wê çarçoveyê de wê 14 hezar şitlên daran li gundên navçeya Sûrê werin belavkirin....