'Keştiya Azadiyê' wê Sêşemê bi rê bikeve
'Keştiya Azadiyê' ku bi daxwaza azadiya Rêberê Gelê Kurd Abdullah Ocalan aktîvîstên ji deverên cuda yên Ewropayê li hev dicivîne, wê 9'ê Mijdarê ji Atînayê bi rê bikeve.
Nivîskar, parêzvanên mafên mirovan, hiqûqnas, siyasetmedar û akademîsyenên ji welatên cuda yên Ewropayê tevlî çalakiya 'Keştiya Azadiyê' dibin.
Çalakiya 'Keştiya Azadiyê' ji aliyê Însiyatîfa 'Azadî ji Abdullah Ocalan re' di çarçoveya kampanya navneteweyî de ya bi şiyara 'Dem ew dem e; Azadî ji Abdullah Ocalan re, aştî ji Kurdistanê re' tê lidarxistin.
Aktîvîstên ku tevlî çalakiyê dibin, roja Duşemê wê li Yewnanistanê hin hevdîtinan bikin. Di lîsteya serdanê de koalîsyona çep a radîkal Syriza, Yekîtiya Gel (LAE), Pêla Çep a Nû (NAR) û rêxistina civakî ya sivîl DIKTIO hene.
'Keştiya Azadiyê' ku wê 9'ê Mijdarê ji Atînayê bi rê bikeve, wê 12'ê Mijdarê bigihêje Îtalyayê. Di dema vê rêwîtiyê de wê paradîgma, feslefeya Rêberê Gelê Kurd Abdullah Ocalan û kampanya ji bo azadiya Ocalan bê nîqaşkirin. Çalakger dixwazin fikrê Abdullah Ocalan bigihînin her kesî.
'Keştiya Azadiyê' wê 12'ê Mijdarê li bendergeha Napolî ya Îtalyayê bi rengekî girseyî bê pêşwazîkirin. Pêşwazîkirin wê bi çalakiyên siyasî û çandî bi dawî bibe.
