Fermandariya Biryargeha Navenda Parastina Gel (HSM) diyar kir ku Sînan Dersim (Dalokay Şanli) di 27’ê Cotmeha 2020’an de di êrîşa hewayî ya dewleta Tirk de şehîd bûye. Dîwana Serokatiya KCDK-E’yê peyameke bibîranînê weşand.

Kongreya Civakî ya Kurdan a Demokratîk a Ewropayê (KCDK-E) diyar kir ku Sînan Dersim ji bo mezinbûna saziyên wan û li Ewropayê xwerêxistinkirina wê mezin bike, gelekî xebitiye.

Di peyama KCDK-E’yê de ev tişt hate diyarkirin:

“Têkoşîna azadiyê ya Kurdistanê tiştekî ji leza xwe kêm nake û mezin dbie. Gelê Kurdistanê bi biryarariyeke mezin û helwesteke xurt a têkoşînê li dijî konsepta faşîst, qirker û êrîşkar a dewleta Tirk a dagirker ji bo parastina hebûna xwe her tiştî dike. Di vê têkoşînê de berdêlên mezin dide. Li her enî, kozik, çeper û qadê de bi çalakiyan ciwanên Kurd xwîn û canê xwe feda dikin û tevlî nav karwanê şehadetê dibin. Şehadet bûye liyakat, rûmet û navê jiyana azad.

Zîlan, Bêrîtan, Delal, Azê, Apê Huse, Atakan, Demhat, Serhat û Çîçek û gelek şehîdên me yên qehreman li ser axa Kurdistanê şehîd bûne.

Me bi xemgînî bihîst ku Sînan Dersim jî li çiyayên Kurdistanê şehîd bûye. Vegotin û qalkirina tevlêbûna Sînan Dersim a li nav pêvajoya şoreşê ne hêsan e. Sînan Dersim wekî şoreşger û welatparêzekî mezin û kedkarê şoreşê tevlî şoreşa Kurdistanê bûye û gelek salan li qada Ewropayê xebitiye. Ew wekî endamekî KCDK-E’yê di nav xebatên rêxistinkirina Kurdên li Ewropayê de cih girtiye. Em diyar dikin ku ew wekî şoreşgerekî berdêleke mezin daye û şehadeta wî xwedî wateyeke mezin e. Ew Apoyiyekî wisa bû ku şoreşgerekî mezin bû, rast diaxivî û rast dixebitî û li ser bingeha rastiyan heqîqet diparast. Dema em vî şoreşgerekî mezin ê ku jiyana xwe dabû şoreşa Kurdistan û dinyayê bi bîr bînin, em ê bi tenê qala bîranînên wî nekin. Li ser esasê wateya ku wî daye şoreş û sazîbûnê, em ê xwedî li peywirên xwe derkevin, keda xwe bi keda wî, xebatên xwe bi xebatên wî bikin yek. Em soza xwe ya ji bo wî û rêhevalên xwe yên şehîd re dubare dikin ku em ê layiqî îdealên wî bin.

Sînan Dersim ji bo mezinbûna saziyên me û li Ewropayê xwerêxistinkirina wê mezin bike, gelekî xebitiye. Em ê jî xebat û hewldana wî kûrtir bikin, ji bo ku em rêxistinkirina xwe mezin bikin û bibin xwediyê serkeftinên mezin çi hewce be, em ê bikin.

Em sozê didin şehîdê mezin Sînan Dersim û hemû şehîdên xwe , peyv rûmet e, em ê pêwistiyên rûmetê bi cih bînin û wan bi rêz û hurmet bi bîr tînin.”