Parêzerên Rêberê Gelê Kurd Abdullah Ocalan, bi daxwaza ji nû ve darizandina muwekîlê wan, careke din serî li 11. Dadgeha Cezayê Giran a Enqerê dan ku vê dadgehê der heqê Ocalan de biryara mehkûmiyetê dabû.

Li gorî nûçeya li Ajansa Nûçeyan a Dîcleyê (DÎHA), Parêzerên Rêberê Gelê Kurd Abdullah Ocalan Rêzan Sarica, Cengîz Yureklî û Mazlûm Dînç, li ser bingeha xala 2. a demborî ya maddeya 21. a qanûna bi hejmara 6459 ku mevzûata ji nû ve darizandinê sererast dike û li nava raya giştî jî weke 4. pakêta dadgeriyê tê zanîn, ji bo muwekîlê wan ji nû ve bê darizandin, bi daxwaza "ji nû ve darizandin û rawestandina bicihanîna ceza" serî li 11. Dadgeha Cezayê Giran a Enqerê dan, ku vê dadgehê beriya niha der heqê Ocalan de biryara cezayê muebbetê yê girankirî dabû. 

Di serlêdana ji nû ve darizandina Ocalan de, parêzeran ev sedem û daxwaz rêz kirin: "Hikmê mehkûmiyetê bi binpêkirina Peyama Mafên Mirovan a Ewropayê hatiye dayîn û bi biryara Dadgeha Mafên Mirovan a Ewropayê re ev binpêkirin hatiye tespîtkirin, lewma em dixwazin muwekîlê me Birêz Ocalan ji nû ve bê dariznadin, li gorî madeya 312. a Qanûna Mûhakemeya Ceza bicihanîna ceza were betalkirin an rawestandin, eger mehkemeya we ya rêzdar xwedî nêrîneke berovacî vê be, em bi rêzdarî dixwazin li ser bingeha xala 2. a demborî ya maddeya 21. a qanûna bi hejmara 6459 a hin Qanûnên ji bo Azadiya Raman û Mafên Mirovan sererast dike, ku tê de tê gotin 'Ji 15.06.2012'an û pê ve, ji bo kesên li pêşberî Komîteya Wezîran a Konseya Ewropayê ve tê venihêrtin', bi daxwaza betalkirinê dosya ji Dadgeha Destûra Bingehîn re were şandin û huqmê qanûnî yê hatiye stendin, were betalkirin."