Bi dehan welatiyên ji gundên navçeya Şera ya Efrînê ber bi sînor ve meşiyan û li bakûrdê Kurdistanê li dijî kiryarên leşkên Tirk meş lidar xistin. Leşkerên Tirk welatî gulebarankirin û di encama gulebaranê de 2 kes birîndar bûn.

Piştî ku leşkerên Tirk gule li ser welatiyên ji gundê Dêr Soran a li ser sînorê di navbera Bakûr û Rojavayê Kurdistanê de reşandin, di encamê de 2 welatî birîndar bûn û rewşa Izet Mehmû ku yek ji birîndaran xetere  û niha li Nexweşxaneya Kilîs ya Bakûrê Kurdistanê tê derman kirin. Li ser vê yekê bi dehan Efrîniyên ji gundê Aykdim a navçeya Şera û gundên derdorê berê xwe dan sînor û li ser xaka Bakûrê Kurdistranê li dijî êrîşên Leşkerên Tirk meş lidar xistin.

Tevî ku bi dehan leşkerên Tirk hatin cihê çalakiyê jî welatiyan meşa xwe dewam kirin û duruşmeyên yekîtiya gelê Kurd avêtin. Ciwanên ku tevlî meşê bibûn hêrsa xwe li dijî leşkerên Tirk nîşan dan û ji wan re gotin tu cûdahî di navbera Erdogan û Beşar El-Esed tunye. Ciwanan ji leşkeran re gotin ku Rejîma Baas wan bi çekan dikujin û Hikûmeta Tirkiyeyê jî ambargoya li ser herêmê ferzkiriye û  nahêle gelê herêmê pêdiviyên xwe ji Bakûrê Kurdistanê bînin.

Meşa ku hinek ciwanên ji Bakûrê Kurdistanê jî tevlî bûn, derdora 2 demjimêran dom kir. Di heman çarçoveyê de jî di Hezîrana borî de jî leşkerên Tirk ciwanek ji gundê Dêr Soran dema pêdiviyên xwe ji wî aliyê sînor di anî qetilkirin.