Di nava mehekê de 180 ciwanên ji navçeya Cindêrisê tevlî nava hêzên YPG/YPJ'ê bûne.

Piştî berxwedana Kobanê û bi taybet piştî banga seferberiyê ya Rêberê Gelê Kurd Abdulah Ocalan tevlîbûna ciwanên Kurd a di nava hêzên YPG/YPJ'ê de zêde bû. Li gorî agahiyên ji rayedarên YPG'ê hatine girtin li navçeya Cindêris a Efrînê di meha buhrî tenê de 180 ciwanên ku temenê wan di nava 18-30 salî de tevlî hêzên YPG/YPJ'ê bûne.

Rayedarên YPG'ê yên herêma Cindêrisê dan zanîn ku di mehekê de 180 kesî ku ji pêkhateyên Kurd û Ereb in serî li Navenda Şehîd Nalîn a YPG'ê dane û tevlîbûna xwe ragihandine.

Fermandaran gotin ku ji bilî wan kesan kesên ku temenê wan nêzî 50 salî jî serlêdan kirine û xwestine di erka parstinê de cihê xwe bigrin û amadekariya xwe ya di demên lezgîn de anîne ziman.

Şervanên nû tevlî YPG/YPJ'ê bûne kêfxweşiya diyar kirin û gotin ku ew amede ne parastina hemû Rojava bikin û tevlî şerê li Kobanê û Cizîrê jî bibin. Gelek ji ciwanên tevlî YPG'ê bûne cihê xwe di tabûra nû ya Şehîd Osman Miqdad de girtin û ên din jî li ser tabûrên nû yên YPG'ê hatin belavkirin.