Li Başûrê Kurdistanê 17 partiyên siyasî derbarê mijara ku ciwanên herêmê di nava refên Dewleta Îslamî ya Iraq û Bîlad El-Şam/ Eniya El-Nusra de şerê tevgera Kurdî û şoreşa Rojavayê Kurdistanê dikin de, hemû hêzên Kurdî hişyar kirin. Partiyan her wiha ji Hukûmeta Herêma Başûrê Kurdistanê xwest ku li dijî vê yekê tedbîran bigire.

Li navenda Partiya Zehmetkêşanî Kurdistan a bajarê Silêmaniyê ya Başûrê Kurdistanê 17 partiyên siyasî civînek li dar xistin û mijara ciwanên herêmê ku di nava refên Dewleta Îslamî ya Iraq û Bîlad El-Şam/ Eniya El-Nusra şerê tevgera Kurdî û Şoreşa Rojavayê Kurdistanê dikin anîn rojevê.

Partiyên siyasî aliyên ku rê li pêşiya ciwanên Kurd ên Başûr vedikin û wan bi navê “cîhadê” dişînin Sûriyeyê û di şerê li dijî Kurdên Rojavayê Kurdistanê de bi kar tînin, şermezar kirin.

Partiyên siyasî di civînê de ji bo ku rê li pêşiya van bûyer bê girtin belgeya ji sê xalan pêşkêşî rayedarên Hukûmeta Herêmê kirin.

1-      Saziyên pêwendîdar û hêzên asayişê pêwîst e vê rewşê bişopînin û helwestên pêwîst nîşan bidin.

2-      Hemû navendên ragihandinê yên hemû aliyên siyasî li hemberî vê rûdanê erkên xwe bi cîh bînin, rûdanê şermezar bikin û ciwanan hişyar bikin.

3-      Pêwîst e Wezareta Diyanetê ya Hukûmeta herêmê ji hemû kesayetên olî û îmamên mizgeftan bixwaze ku vê rûdanê şermezar bikin.

Partiyên siyasî yên tevlî civînê bûne ev in:

Partiya Çareseriya Demokratîk a Kurdistanê (PÇDK)

Yekîtîya Nîştimanî Kurdistan (YNK)

Tevgera Goran

Partiya Demokrat a Kurdistan (PDK)

Partiya Karkeran û Zehmetkêşanî Kurdistan

Tevgera Demokratîk a Gelê Kurdistan

Koma Îslamî ya Kurdistan

Tevgera Îslamî ya Kurdistan

Partî Niştimanî Kurdistan

Tevgera Rizgariya Demokratîk a Kurdistan

Partî Muhafezekarî Kurdistan

Partiya Demokrata Pêşverû a Kurdistan

Tevgera Aştî ya Kurdistan

Yekîtiya Îslamîya Kurdistan

Partiya Komunîst a Kurdistan

Partiya Sosyalîst a Demokrat a Kurdistan

Partî Zehmetkêşanî Kurdistan