Malbatên girtiyên nexweş û girtiyên cezayê wan xilas bûye lê nayên berdan, di roja 105’emîn de Nobeta Edaletê ya li Îzmîrê didomînin. Çalakî li ber Nûnertiya DBP’ê ya Herêma Egeyê pêk hat û rêveberên HDP’ê piştgirî dan malbatan û dirûşmeya “Bijî berxwedana girtîgehan” berz kirin.

Hevseroka HDP’ê ya Navçeya Alîagayê ya Îzmîrê Gul Ekîcî da zanîn ku ew piştevaniya nobeda edaletê dikin û êdî hatiye wê astê ku girtîgeh bûne cihê îşkence û mirinê. Ekîcî destnîşan kir ku roj nîne cenaze ji girtîgehan dernakeve û ew dixwazin şertû mercên girtiyan baş bibin. Ekîcî bal kişand ser cenazeyê Hakan Arslan ku di kîs de radestî malbata wî kiribûn û got: “Ev yek şerma mirovahiyê ye.” Ekîcî xwest her kes piştgiriyê bide malbatên girtiyan.

Dayika girtî Hanim Sever jî bang li her kesî kir ku li dijî îşkence, tecrîd û şer rabin ser pêya û û êdî divê mirov nemirin û xwest şer bi dawî bibe û ew ji mirinan re dibêjin êdî bes e.