Endamên Partiya Şoreşger bi armanca protestokirina Qetlîama Zaxoyê duh êvarê li ber avahiya Rêxistina AKP’ê ya Navçeya Kadikoya Stenbolê meş li dar xistin û dirûşm berz kirin. Çalakvanan ji bo balê bikişînin ser qetilkirina pitikê, darbestek biçûk hilgirtin. 

Endamê Partiya Şoreşger Erkîn Barin di çalakiyê de axivî û destnîşan kir ku hêzên dagirker li Kurdistanê 9 kes bi bombebaranê qetil kirine û got: “Ev darbest darbesta Zehraya pitik e. Em kujeran baş nas dikin. Kujerên ku li Zehraya biçûk dane, li vir in. Kujer AKP bi xwe ye. Kujerên Zehra, Berkîn Elvan û Ceylan Onkol heman kujer in.” 

Piştre polîsan Barin destgîr kirin. Tê payîn ku ji bo Barin îfade bide dozgeriyê sewqî Edliyeya Anadolûyê ya li Kartalê bikin.