Li navenda Çewlîgê û navçeyên wê yên Dara Hênê, Kanîreş û Bongilanê di 6-7’ê mijdarê de di serdegirtina malan de 18 kes hatibûn binçavkirin. 11 kesên hatibûn binçavkirin piştî îfadeyên wan ên li miduriyeta polîsan hatin berdan, Hevserokê Partiya Wekhevî û Demokrasiyê ya Gelan (HEDEP) Ubeyîd Ozer, Mazlûm Serînyel, Abdûrrahman Sav, Şefîka Dogan û Alaattîn Narînç di nav de 7 kes sewqî Edliyeya Çewlîgê hatin kirin.

7 kesên bi îdiaya “endamtiya rêxistinê” û “fînansekirina rêxistinê” tên sûcdarkirin piştî wergirtina îfadeyên wan ên dozgeriyê bi daxwaza girtinê sewqî Dadgeha Ceza ya Sulh a Nobedar hate kirin. Hevserokê HEDEP’ê ya Bongilanê Ozer, Serînyel, Sav, Dogan û Narînç bi heman îdiayan ji aliyê dadgehê ve hatin girtin û 2 kes jî bi şertê kontrola edlî hatin berdan.