Ji bo meşa 8'ê Gulanê ya li Dusseldorfê, ku bi dirûşma "Li dijî faşîzmê mil bi mil" tê lidarxistin, rêxistinên civakî yên sivîl, saziyên jinan, rêxistin û partiyên çep daxuyaniyeke nivîskî weşandin û banga tevlîbûnê kirin.

Di daxuyaniyê de hat bibîrxistin, ku li dû bazariya kirêt a navbera Merkel-Erdogan, li Elmanyayê 19 aktîvîstên polîtîk ên Kurdistanî û Tirkiyeyî bi hincetên bêbingeh hatine girtin.

Di daxuyaniyê de hat ragihandin, ku dewleta AKP'ê pêla nîjadperestiyê ya li Kurdistan û Tirkiyeyê dimeşîne dixwaze li Ewropayê jî bidomîne û hat gotin, "Em ê meydanê ji propaganda nîjadperest û faşîstên Tirk re nehêlin."

Di dewama daxuyaniyê de hat gotin, "Weke rêxistinên dost ên antî faşîst ên Elman û hêzên demokrasiyê yên Kurdistanî û Tirkiyeyî, em ê bi hev re li dijî nîjadperestî û faşîzmê têbikoşin. 8'ê Gulanê di heman demê de roja têkçûna faşîzma Hîtler e. Em bang li tevahiya hêzên pêşverû, demokrat, şoreşger û gelên xwe yên welatparêz dikin, ku roja 8'ê Gulanê beşdarî meşa li Dusseldorfê bibin."

Hat ragihandin, meşa ji aliyê Bundnis 'Dusseldorf stellt sich quer' DSSQ û Platforma Yekîtiya Hêzê ya Demokratîk ve tê organîzekirin wê saet di 13:00 de li ber HBF destpê bike.

Saziyên destekê didin vê çalakiyê: "ANTIFA Duss. AGIF, Akkustan, ATIF, Ceni-Frauenburo, DGB -Dusseldorf/Bergischesland, Die LIKE, DKP,  FIDEF,  GEW-Dus., Interventıonistische Linke (i furiosi, see red), NAV-DEM, Piraten-Partei, Mor Îsyan, SDAJ-Dus, YJK-E (Frauen aus Kurdistan), YDG, YXK, VVN-BdA (Bund der Antifaschisten-Dus.)"