Greva birçîbûnê ya bêdawî û bêdorveger a girtiyên bi nexweşiya giran a li Girtîgeha Tîpa F a Hejmar 2 ya Ewlekariya Bilind a Kiriklarê ku li dijî zêdebûna binpêkirinên mafan dane destpêkirin, di roja xwe ya 9’emîn de berdewam dike. Komîsyona Girtîgehan a Şaxa Komeleya Hiqûqnasên Azadîxwaz (OHD) a Îzmîrê diyar kir ku wê vê hefteyê careke din bi girtiyan re hevdîtinê pêk bînin.

Heyetek ji Komîsyona Hiqûq û Mafên Mirovan a Partiya Demokratîk a Gelan (HDP), Komeleya Mafên Mirovan (ÎHD), Komeleya Hiqûqnasan a ji bo Azadiyê (OHD) û Baroya Îzmîrê pêk dihat, çûn serdana Girtîgeha Kiriklarê ya ku greva birçîbûnê lê berdewam dike.

DENÎZLÎ

Çalakiya greva birçîbûnê ya girtiyê bi nexweşiya giran Ekîm Polat ê 24 salî ku li Girtîgeha Tîpa T a Denîzliyê bi daxwaza mafê dermankirinê dabû destpêkirin di roja 36.’an de ye. Dayika Songul Îlker jî ku ji bo mafê kurê xwe yê tenduristiyê û daxwazên wî bêne cih, çalakiya rûniştinê li ber Girtîgeha Tîpa T a Denîzliyê dabû destpêkirin di roja 28’an de berdewam kir.

Dayika Îlker anî ziman ku kurê wê rastî zext û êşkenceyê hatiye û got, “Ji ber ku mafê wê yê dermankirinê hatiye astengkirin, ketiye greva birçîbûnê. Ez dixwazim her kes dengê Ekîm bibihîze û bibe dengê wî da ku mafê dermankirina wî bê misogerkirin.”