Kurdistanî û dostên wan ên bi hefteyan e li Kolnê çalakiyê lidar dixin, deklarasyona Şaredariyên DBP'ê ya duh li Amedê hat weşandin silav kirin û bang li dewleta Tirk kirin ku hurmetê nîşanî xwerêveberiyên Kurdan bide.

Zêdeyî 500 Kurdistanî û dostên wan, saet di 15:00 de ji meydana Ebertplatzê dest bi meşê kirin û li ber Dêra Domê ya dîrokî mîtîngek pêk anîn. Di çalakiyê de dirûşmên "Bijî Serok Apo", "Kujer Erdogan" û "Bijî Berxwedana Cizîrê" hatin qîrîn. Girseya gel li ber konê ku ji roja Duşemê û vir ve hatiye vedan, civiya.

Kurdistaniyan bi pankart û dowîzan meydana Domê xemilandin û belavokên bi zimanê Elmanî belav kirin.

'DIVÊ ŞER JÎ BI EXLAQÎ WERE MEŞANDIN'

Kurdistaniyan nerazîbûneke tund nîşanî êrîşên dewleta Tirk ên li hemberî şehîdgehên gerîla dan û gotin, "Girîng e şer jî bi exlaqî bê meşandin." Kurdistaniyan bang li hikûmeta AKP'ê kirin ku dest ji helwesta xwe ya li dijî mirovahiyê berde.

'HÛN RUH Û HÊZÊ DIDIN ME'

Hevserokê HDP'ê yê Navçeya Pazarcixê Salman Okmen jî beşdarî mîtîngê bû û axaftinek kir. Okmen bal kişand ser çalakiyên xwedîderketinê yên gelê li Ewropayê û got, "Ev helwest û xwedîderketina hûn nîşan didin, hêzê dide me. Tevî ku hûn dûrî xaka xwe ne jî, bi ruhê piştevaniyê hûn hêzê didin her kesî. Di 1'ê Mijdarê de em ê careke din bi ser bikevin."

HUNERMENDÊN TEV-ÇANDÊ KONSER DAN

Di mîtîngê de hunermendên TEV-ÇAND'ê ji bo xwerêveberiyê silav bikin, konser dan. Di konserê de hunermendên ji Koma Berxwedan û TEV-ÇAND'ê amade bûn. Mîtîng bi qîrîna dirûşmeyan bi dawî bû.