Civîna Meclîsa Şaredariya Xelfetiyê ya Mehane, li salona konferansê ya li avahiya şaredariyê dest pê kir. Hevşaredarên Xelfetiyê Ayşe Dûrmûş û Mûstafa Bayram, Alîkarê Hevşaredaran Bazo Yilmaz û endamên meclîsa şaredariyê tevlî civînê bûn. Piştî ku Walîtiya Tirk a li Rihayê erkên Şaredariya Xelfetiyê bi qeymeqamtiya xwe ve girê da, gel ket nava tevgerê û berê xwe da ber avahiya şaredariyê. Ji ber tevlîbûna girseyî li salona konferansê cih nema. Gelek ji beşdaran li cihê rûniştinê nedîtin. Hevşaredar Ayşe Dûrmûş û Mûstafa Bayram civîn bi rê ve bir. Bayram di destpêka civînê de axivî û spasiya gel kir, ku piştgiriyê dide wan.

Hevşaredar Bayram ji gel û endamên meclîsa şaredariyê re ragihand, ku Walîtiya Tirk a Rihayê hemû erkên şaredariyê bi qeymeqamtiya xwe ve girê daye û bi vî rengî di emel de dest daniye ser Şaredariya Xelfetiyê. Bayram anî ziman, ku ev kiryarên bi Biryarnameyên Xwedî Hukmê Qanûnî tên kirin, şaş in û zerarê dide hestên jiyana bi hev re ya gelan.

Piştî ku biryara Walîtiya Tirk a Rihayê hat ragihandin, civîna meclîsê bi rojeva hatiye diyarkirin, dewam kir. Di civînê de endamên meclîsê yên AKP'yî jî bûn, lê balkêş e hemû bêdeng man.

Civîn piştî nirxandina hemû mijarên di rojevê de, bi çepikan qediya.