Şaredariya Sûrê di çarçoveya kampanyaya xwe bi navê "Ji bo pêkanîna hevsengiya ekolojîk "bi hezaran dar li xelkê navçeya Sûrê belav kir.

Ji bo pêkanîna derdoreke bi şînkahî û xweşikiya xwezayî Şaredariya Sûrê li Taxa Çariklî ya girêdayî navçeya Sûrê dar li saziyên civakî û xelkê taxê belav kir.

Di çalakiya belavkirina daran de Hevserokên Sûrê Fatma Şik Barut, Seyid Narîn û endamên Meclîsa Sûrê jî amade bûn.

Armanca şaredariyê ji vê kampanyayê ew e ku di nava salekê de 9 hezar dar bên çandin û wekî destpêkê wan niha 3 hezar dar li xelkê Taxa Çarikli belav kir.

Di dema belavkirinê û sohbeta Hevşaredarên Sûrê bi gelê taxê re li ser wê yekê rawestiyan û dan xuyakirin ku hewcedarî bi destek û piştgiriya gelê me heye da ku em vê kampanyayê bi rengê tê xwestin bibin serî û xwedî li xwezaya xwe derkevin.

Her wiha hevşaredaran da xuyakirin ku ew dixwazin xwezaya kesk û xweşik ji zarokên xwe re bihêlin û em ji zarokên xwe re mîrateyeke baş û xwezayeke paqij bihêlin da ku bêtir ew jî xwedî li xwezaya xwe û bajarê xwe derkevin.