Koma Awazên Çiya ku heta niha bi gelek stranên xwe di nava gel de tê hezkirin, vê carê ji eniya xwe bi strana ‘Ji bo gelan HDP’ stranek amade kir. Di strana ku Koma Awazên Çiya amade kiriye de, hemû neteweyên Tirkiye tê de cihê xwe digirin. Stran bi zaravayên Kurdî ango Kurmancî, Kirmançkî û herwiha bi zimanê Tirkî û Erebî tê gotin.

Koma Awazên Çiya ku di bin banê Tevgera Çand û Hunerê de li çiyayên Kurdistanê kar û xebatên xwe birêve dibe, heta roja me ya îro çend stranên wekî Destana Zapê, Oremar,  Awazek tê û herwiha gelek stranên şoreşgerî çêkiriye. 

Awazên Çiya vê carê jî ji bo piştgiriya bi HDP’ê re stranek bi zimanê Erebî, Tirkî û bi du zaraveyên zimanê Kurdî yên Kirmanckî û Kurmancî amade kiriye. Di vê strana  pir rengî ya bi navê “JI BO GELAN HDP” de li derveyî zimanan, ji gelek neteweyan motîfên hunerî û ensturman jî hatine bi kar anîn. 

Wekî ku tê zanîn li Tirkiye û Bakurê Kurdistanê di 7’ê Hezîranê  de hilbijartinên giştî yên parlementeriyê wê pêk werin.  Di vê hilbijartina îsal de HDP li ser navê hemû gelên demokratîk û azadîxwaz wekî partî tevlî hilbijartinan dibe.  Ji bo ku HDP benda hilbijartinê derbas bike bi awayekî seferberiyê û dilxwazî kar û xebatên hilbijartinê têne meşandin. Koma Awazê Çiya jî ji eniya xwe ji bo HDP’ê straneke bi coş û pir zimanî  amade kir.

Der barê amadekirina strana HDP’ê, armanca vê stranê, kar û xebatên Koma Awazê Çiya de endamê komê Argeş Delîla wiha got: “Li Tirkiyê û Bakurê Kurdistanê wê di 7’ê Hezîranê de  hilbijartina giştî pêk were. Ev hilbijartin bê guman pir pir girîng e. Cara yekemîn e hemû neteweyên li Tirkiyeyê hatine pelçiqandin bi yek dengî tevlî hilbijartinê dibin. Temsîliyeta xwe di yek partiyê de dibinîn ev jî HDP ye. Gava ku me rastiya HDP’ê dît xeta ku temsîl  dike me dît, me  jî wek Koma Awazê Çiya  li serê van çiyayên azad biryar da ku bi berhemekê tevlî vê xebata ber bi azadiyê bibin.”

Der barê  pirzimaniya vê stranê de endama komê Zozan Gabar jî diyar kir ku wan xwestiye di gotinan cih bidin hinek gelan û wiha dewam kir: “Ji bo vê jî me bi Tirkî, Erebî û bi du zaravayên Kurdî ev stran amade kir. Wekî kom nêrîna me ya hevpar ew bû ku em di gotinên stranê de cih bidin hin neteweyan ku ji aliyê serdestan ve hatine çewisandin. Armanca me di naveroka vê stranê de cih bidin hemû neteweyên ku zimanê wan,  çanda wan û nasnamaye wan hatiye qedexekirin.  Ji ber ku me di sekna HDP’ê de nêzîkatiyeke wisa dît û me jî xwest li gorî perspektîfa HDP’ê stranekê amade bikin.” 

Gotinên stranê yên bi zaravayê kurmancî wiha ne:

Ji kevana Zagros Toros rojek nû li me hilat.                                                                                                                          

Tîrêj berda derya spî keşke sora dîcle firat.                                                                                                                                          

Bi destê dayika kedê dara jînê lê şîn hat.                                                                                                                                  

Şax dayîna berhemî ye bindêra hemû gelan.                                                                                                                        

Kurd, Tirk, Ermenî, Ereb, Çerkez û Laz’e Rom, Suryan, Azerî  bi her gelan şanaza.                                                      

Dengê Xweza,HDP. Vîna jinê, HDP. Hêza ciwana, HDP. Zar û pîra, HDP.                                                                

Bişenga Kobanê dengê Gezî HDP.                                                                                                                                                            

Bi jiyana nû heqîqete HDP.