Navenda Ragihandin û Çapemeniyê ya HPG'ê ragihand ku tevgera leşkerî ya artêşa Tirk dewam dike û li qada Heftanînê ji bo provokasyonê derxîne û rê li ber şer veke, di nava hewldanan de ye.

Di daxuyaniya HPG'ê ya li ser tevgera leşkerî ya artêşa Tirk de ev agahî bi raya giştî re hat parvekirin:

"Di 17'ê Gulanê saet di navbera 16:00 - 17:00 de li ser xeta sînor a herêma Xakurê, balafirên şer ên artêşa T.C a dagirker tevgeriya ne. Ev tevgera hewayî li qadên me yên gerîla zêde dibin.

Ji saet 22:30 ê 17'ê Gulanê heta saet 06:00 ê 18'ê Gulanê li ser qada Mamreşo, Adilbegê û Şukê yên herêma Avaşînê, di 17'ê Gulanê saet di navbera 07:00 - 23:00 de li herêma Metîna û xeta sînor, heman rojê saet di navbera 07:00 - 11:00 de li qadên Çiyayê Reş û Şehîdan ên Zapê, di 18'ê Gulanê saet di navbera 02:30 - 05:00 de li qada Verxelê, ji sibeha 16'ê Gulanê heta saet 09:00 ê roja 18'ê Gulanê li ser herêma Besta ya Şirnexê artêşa T.C a dagirker bi pêgerên hewayî yên bê mirov, keşif kiriye.

Di 18'ê Gulanê saet di navbera 08:00 - 09:00 de ji Qereqola Oremarê ya li navçeya Colemêrg Geverê, qadên Şehîd Rahîme û Şehîd Bager ên herêma Avaşînê bi obus û hawanan hatine bombekirin. Hêzên me yên gerîla jî di cih de bi çekên giran bersiv dane van êrîşan.

Di 18'ê Gulanê saet di 02:00 - 06:00 de li qada Şehîd Kendal a herêma Heftanînê pêgerên hewayî Yên bê mirov ên artêşa T.C a dagirker keşif kirine. Di dema vê tevgera keşfê de artêşa Tirk li qada Şehîd Kendal li girekî din jî bicih bû û bi qasî 500 metreyên din xwe nêzî herêmên me yên gerîla kir. Artêşa Tirk hewl dide li vir provokasyonan derxîne û hêzên me yên gerîla bikişînin nava şer."