Cenazeyê gerîlayê HPG'ê Hasan Avci (Harûn Kanîrş) ê di 10'ê Sibatê de li bejahiya navçeya Çewlik Azarpêtê di mercên zivistanê de jiyana xwe ji dest da ji aliyê bi hezaran kesî ve hat veşartin. Cenazeyê Avci li duryana Kanîreş û Bonlîganê ji aliyê sedan kesan ve bi dirûşmeya "Şehîd namirin" hate pêşwazîkirin. Cenazeyê Avci piştre bi konvoyeke qelebalix ber bi gund ve hat şandin û li pêşiya gund bi dirûşme û çepika hate pêşwazîkirin. 

Cenazeyê Avci li gund birin mala lê hatî dinê. Cenaze ji aliyê endamên malbatê ve hate pêşwazîkirin. Piştre cenaze ji aliyê welatiyan ve hate wergirtin û bi meşê birin goristana gund. Di meşê de posterên Rêberê Gelê Kurd Abdullah Ocalan, wêneyên Avci, alên PKK, KCK, YPG û YPJ'ê hatin hilgirtin û dirûşmên "Bê Serok jiyan nabe" û "Şehîd namirin" hatin berzkirin. 

Cenazeyê Avci li ber sirûda "Çerxa Şoreşê" hat veşartin. Piştî merasîma definkirinê bavê Avci Behçet Avci axivî û diyar kir ku kurê wî şehîdê hemû Kurdistanê ye û serê gelê Kurdistanê sax be.

Namzetê HDP'ê Serhat Gumuş jî diyar kir ku Kurd wê bi rêxistinbûna xwe bersiva îxanetkaran bide.

Piştî axaftinan girseyê malbata Avci ziyaret kir û piştre ji bo tevlî merasîma cenazeyê gerîlayê PKK'ê Fehmî Yilmaz (Egît Kop) bibin ber bi Gimgimê ve ket ser rê.