Kesê bi navê Ebdulrezaq Îbrahîm di 2'ê Sibata 2016’an de ji bo gendelî û fêlbaziya wî eşkere nebe, kesa bi navê Henan Îbrahîm kuşt.

Dadgeha Gel rûniştina destpêkê ya dozê danê vê sibehê li navenda Akademiya Celadet Bedirxan a li bajarê Qamişlo pêk anî Rûniştinê heta saet 16.00 dewam kir.

Ji hemû saziyên civaka sivîl nêzî 80 kes amade bûn. Piştî deqeyeke rêzgirtinê, dosyayên tewanbar Ebdulrezaq Îbrahîm û hevkarê wî Îbrahîm Hisên Kûsa yên der barê kuştina vê jinê û veşartina cenazeya wê de hatin xwendin.

Piştre li her du tewanbaran hate guhdarîkirin, gelê ku li vir amade bûye jî ji Dozgeriya Giştî û ji tewanbaran pirsên xwe kirin.

Piştî gotûbêjên berfireh di navbera gel, dozgerî û tewanbaran de bi piranî kesên beşdar ev hukm erê kirin ku Ebdulrezaq Îbrahîm heta bi hetayê li girtîgehê de bimîne û Îbrahîm Kûsa jî salekê girtî bimîne.