Cenazeyê şervanê YPG'ê Loqman Bekir bi merasîmeke girseyî hat veşartin.

Bi sedan welatiyên Efrînê bi armanca wergirtina cenazeyê Şervanê YPG’ê Loqman Bekir (Diyar Raco) li ber nexweşxaneya Avrîn a Efrînê kom bûn. Girseyê piştî wergirtina cenaze bi karwanekî wesayîtan ber bi goristana Şehîd Refîq a li gundê Metîna ya navçeya Şera ya Efrînê derketin rê. Li rêya ketina goristanê girseya gel ku alên YPG, YPJ û TEV-DEM’ê di destê xwe de girtibûn û posterên Rêberê Gelê Kurd Abdulah Ocalan û wêneyên têkoşeran hilgirtibûn cenaze li ser milan kirin û ber bi goristanê ve meşiyan.

Merasîm bi merasîmeke leşkerî ji aliyê YPG’ê ve hate destpêkirin. Piştre Serokê Desteya Parastinê yê Efrînê Ebdo Îbrehîm axivî û sersaxî ji malbata şervanê YPG’ê û hemû cangoriyên azadiyê re xwest û destnîşan kir ku dê heta dawî li ser rêya cangoriyan berxwedana xwe ya azadiyê bidomîn in.

Di merasîmê de her wiha li ser navê Saziya Malbatên Şehîdan Mihemed Hesen axivî û destnîşan kir ku gelê herêmê êdî dîroka xwe û rastiya xwe ya azadiyê nas dike û destnîşan kir ku wê heta dawî li ser şopa cangoriyên azadiyê bimeşin.

Di berdewama merasîmê de li ser navê malbata şervanê YPG’ê Diyar Cemal Bekir axivî û got ku wê heta dawî li ser şopa cangoriyên xwe bimeşin.

Piştî axaftinan nasnameya şervanê YPG’ê Diyar Raco ji aliyê Endama Saziya Zimanê Kurdî Rûken Şêro ve hate xwendin û radestî malbatê hate kirin.

Di dawiya merasîmê de girseya gel cenaze bi dirûşmeyan spart axê.