Şêniyên bajarê Dirbesiyê ji bo oxirkirina cenazeya têkoşer Azad Şervan (Zên-Eldîn Sason) li pêşiya Saziya Malbatên Şehîdan kom bûn. Gel piştî ku cenazeya têkoşer Azad Şervan ê ku 27`ê Îlonê di encama qezayekê de jiyana xwe ji dest dabû   ji nexweşxaneya Roj a bajarê  Serekaniyê hildan, ber bi goristana Şehîd Rûstem Cûdî  ve çûn.

Piştî ku şêniyên bajarê  Dirbesiyê û Serekaniyê gihiştin goristana  Şehîd Rûstem Cûdî, şervanên YPJ/YPG`ê merasîma leşkerî li dar xistin.

Bi navê Saziya Malbatên Şehîdan Xelîl Cewher, bi navê Tevgera Civaka Demokratîk (TEV-DEM) Cahid Hesen, bi navê malbata têkoşer Azad Şervan Dîdim Şervan axivîn.

Di nava axaftinan de hate gotin ku ew fermandarên manewî ne û sersaxî ji malbatê  re hate xwestin. Hate gotin ku deskeftiyên Rojava bi fedakariya şervanên ku li ser felsefeya Rêberê Gelê Kurd Abdullah Ocalan têkoşiyane hatine avakirin.

Şervanan cenazeyê hevalê xwe bi berzkirina dirûşmeyan spartin axê.