Cenazeyê gerîlayê HPG'ê Erhan Siyahtaş (Bawer Reşkotî) ê li navçeya Tetwanê di encama êrîşa cerdevanan de di 17'ê Îlonê de birîndar bû û di 18'ê Îlonê de jî jiyana xwe ji dest dane li gundê Nawala ya Qubînê duh bi şev hate definkirin. Piştî merasîma li "Şehîdgeha Xerzanê" cenaze ber bi Êlihê ve hate oxirkirin û li gundê Nawalayê hate definkirin. Parlamenterên HDP'ê û nûnerên saziyan jî di nav de gelek welatî beşdarî merasîmê bûn. 

Piştî ku li goristana gund wecîbeyên olî hatin bicihanîn bi dirûşman ve hate definkirin. Di merasîmê de Serokê MEYA-DER'ê ya Êlihê Şukru Baytar axivî û got ku heta ku zilma li dijî kurdan bidome dê gel kêkoşîna xwe bidomîne.

Parlamentera HDP'ê Mizgîn Irgat jî wiha axivî: "Heval Bawer li axa tetwanê jiyana xwe ji dest da û tevli karwanê aştiyê bû. Gelê kurd dê tu caran Bawer û hevalên wî ji bîr nekin. Navê Bawer û yên ku di têkoşîna azadiyê de jiyana xwe ji dest dan dê bi tîpên zêrîn li rûpelên dîroka Kurdistan û ya cihanê bê nivîsandin."

Parlamentera HDP'ê Saadet Becerîklî jî got ku di nava 3 salan de caneza nehatine û bi şerê ku hatiye destpêkirin ve ciwan dîsa jiyana xwe ji dest didin.

Bavê Siyahtaş, Mehmet Siyahtaş jî diyar kir ku ew naxwazin mirinên leşker û gerîlayan bibînin û tekane daxwaza wan aştî ye.