Li bajarê Klotenê yê ser bi kantona Zurihê, Kurdistanî bi rojeva dîmenên komkujiyê yên li taxên Şêxmeqsûd û Eşrefiyê yên Helebê û serhildanên gel ên li Rojhilatê Kurdistanê ku roja 16’emîn li pey xwe hiştine, civiyan. Civîn bi banga Nûnertiya Partiya Jiyana Azad a Kurdistanê (PJAK) ya Swîsreyê li Komeleya Çanda Rojava ya li Klotenê pêk hat. Di civînê de li ser rê û rêbazên têkoşînê û gavên ku bên avêtin hatin nîqaş kirin.

Di civînê de ku nûnerên partiyên siyasî yên Rojava û Rojhilat û Kurdistanî ji her çar parçeyên Kurdistanê amade bûn, agahî li ser geşedanên dawî hatin dayîn û helwesta li dijî êrîşên li ser gelê Kurd hate nirxandin.

JI BO ROJHILAT BIRYARA ÇALAKIYA LEZGÎN

Di beşa yekem a civînê de serhildanên gel ên li bajarên Rojhilat û êrîşên rejîma olî ya li dijî çalakgeran hatin nirxandin. Hate diyarkirin ku ji ber qutbûna xetên înternet û telefonê li Îranê, agahî bi zehmetî tên girtin û wiha hate gotin: "Em agahiyê ji malbatên xwe nagirin. Hêzên rejîmê rasterast gel dikin hedef, gelek birîndar hene û rê li ber dermankirinê tê girtin. Divê hemû Kurdên li Ewropayê ji bo gelê Rojhilat rabin ser piyan."

Piştî axaftinan, biryar hate girtin ku ji bo Rojhilat komîteyeke lezgîn bê avakirin û di demeke nêz de mîtîngên berfireh bên organîzekirin.

‘DIVÊ HELEB JI BO ME BIBE DERS’

Di beşa duyem a civînê de jî komkujiyên li Rojava û Helebê bûn rojev. Di axaftinan de hate destnîşankirin ku nabe mirov baweriya xwe bi hêzên navneteweyî bîne û girîngiya yekîtiya neteweyî ya Kurd hate dubarekirin. Di civînê de daxuyaniya "Piştî Efrînê em li Helebê jî bi tenê hatin hiştin. Êdî divê em ji bo Kurdistan û Kurdbûnê werin cem hev" derket pêş.

Civîn bi biryara lidarxistina mîtîngeke lezgîn di dawiya hefteya bê de û berdewamkirina civînên bi vî rengî bi dawî bû. Beşdaran civîn bi dirûşma "Kurdistan yek e" bi dawî kirin.