Kurdistaniyên li herêma Stavrapolê ya Rûsyayê dijîn, bi armanca şermezarkirina êrîşên çeteyên girêdayî HTŞ, DAÎŞ û dewleta Tirk ên li ser Rojava li hev kom bûn. Di çalakiyê de Hevserokê Otonomiya Kurd a Navçeya Novoalêksandrovskê Huseynê Çerkez axivî û ev yek anîn ziman: ‘’Em li ser navê gelê Kurd ê li vir qadê çeteyên êrîşkaran û hemû hêzên ku piştgiriyê didin wan şermezar dikin. Dewletên weke Emerîka, Îngilistan, Fransa û Tirkiyeyê bi hev re hêzên terorîst kom kirine û berê wan dane gelê Kurd.’’

Huseynê Çerkez piştre bal kişand ser berxwedana gelê Kurd a li hemberî êrîşên çeteyan û got: ‘’Gelê me li hemberî van hêzan îro li ser pîyan e. Ew ê serî li ber tu hêzan netewîne. Rojavayê Kurdistanê wê ji neyaran re bibe goristan. Gêlê me yê li Rojava, hûn ne bi tenê ne, em hemû bi hev re ne û 60 mîlyon Kurd bi we re ne! Ciwan amede ne ku werin û tevlî Şoreşa Rojava bibin.”

Piştre Qadirê Misret li ser navê rûspîyên Kurdên li Stavropolê axivî, piştgiriya xwe ya ji gel û hêzên Rojava re da diyarkirin û ev yek anîn ziman: ‘’Tu hêz nikarin vîna gele me bişkînin. Ew hewl didin ku di bin navê olê de gelê me bixapînin. Lê belê gelê me bûye yek û planên wan baş dibînin.”

Çalakî bi berzkirina dirûşmeyên weke “Bijî berxwedana QSD” û “Bijî berxwedana YPG û YPJ’ê” bi dawî bû.