Bi pêşengiya Federasyona Civakên Demokratîk (FED-DEM) li Hannoverê, bi beşdariya meclîs û saziyên girêdayî federasyonê, li dijî êrîşên qetlîamê yên li ser Rojava masaya krîzê ya lezgîn hate avakirin.

PYD, Nawyek, Siwana Meclîsa Jinên Êzîdî, FEDA, Meclîsa Ronahî, Meclîsa Gel Hildesheim, Enternasyonalîst, Olderên Civaka Êzîdî Şêx Huseyîn û Ciwan û gelek sazî û dezgehên din beşdarî vê masaya krîzê bûn.

Di civînê de hate destnîşankirin ku êrîşên li ser gelên Rojava armanc dikin destkeftiyên demokratîk ên li herêmê. Bi taybetî komkujiyên li dijî sivîlan wekî sûcê şer hatin binavkirin û bersiv li bêdengiya raya giştî ya navneteweyî hate nîşandan.

Nûnerên saziyan diyar kirin ku divê gelê Kurd ê li Ewropayê dijî û dostên wan piştevaniya xwe ya bi gelê Rojava re mezin bikin, bang li xurtkirina kanalên têkoşîna dîplomatîk û girseyî kirin.

Di çarçoveya masaya krîzê de biryar hatin girtin ku xebatên agahdarkirina raya giştî, înîsiyatîfên dîplomatîk, protesto û çalakiyên girseyî bên rêxistinkirin. Di vê çarçoveyê de ji bo zelalkirina bersivên li dijî êrîşan, biryara danîna konek li ber avahiya parlamena eyaleta Hannover (Landtag) jî hate dayîn.

Bang li dewletên Ewropayê, bi taybetî li Almanyayê hate kirin ku li dijî êrîşên li ser Rojava helwesteke zelal û eşkere bigirin. Endamên masaya krîzê diyar kirin ku ew ê piştevaniya xwe ya bi gelê Rojava re bidomînin û heta ku êrîş bi dawî bibin, têkoşîn bi biryardarî bidome.