Du aktîvîstên Kurd bi îdîaya ku li ser navê Partiya Karkerên Kurdistanê (PKK) li bajarên Kîel û Lubeck’ê xebat dimeşînin, li Dadgeha Cezayê Giran a Hambûrgê dihatin darizandin. Biryara derbarê aktîvîstên Kurd hate eşkerekirin. Derbarê du aktîvîstên Kurd ên di çarçoveya madeya 129b a Qanûna Cezayê ya Elmanyayê de tên darizandin, biryara berdana bi kontrol û bi şert hate dayîn.

Dadgehê derbarê Nîhat Aşut ê ku 12’ê Adara 2025’an hate girtin û meha Cotmehê hate berdan 2 sal cezayê hepsê da û biryar da ku ceza di çarçoveya berdana bi kontrol de were bicihanîn. Derbarê aktîvîstê din ê ku bêyî were girtin tê darizandin, salek û nîv cezayê hepsê hate dayîn. Hat diyarkirin ku her du aktîvîst jî qasî 3 salan wê di bin kontrolê de bên girtin û di nava vê wextê de eger ti sûcan nekin, dê nekevin girtîgehê.

Dadgehê her wiha biryar da ku pereyên di meha Adarê de li herêmên Kîel û Lubeck’ê di serdegirtinan de bi îdîaya ayîdê PKK’ê ne hatine desteserkirin, wê neyên radestkirin.

Serokatiya dadgehê hinceta biryarê eşkere kir, bal kişand ser banga Rêber Apo ya Aştî û Civaka Demokratîk û diyar kir ku her du aktîvîstên Kurd û malbatên wan berê rû bi rûyê zextên kêfî yên dewleta Tirk mane.

Beriya rûniştina biryarê, li ber dadgehê çalakiyeke protestoyî hate lidarxistin. Înîsiyatîfa “Ji Nîhat re azadî” û saziya Azadî daxuyanî dan û daxwaza berdana girtiyan kirin. Di axaftinan de bang li dewleta Elman hate kirin ku dawî li polîtîkayên zextê yên li hemberî Kurdan bîne û piştgiriyê bide pêvajoya aştiyê.

Malbata jineke aktîvîst û antîfaşîst jî ya ku demên dawî li Elmanyayê hate girtin, tevlî çalakiyê bû. Di axaftina li ser navê malbatê hatî kirin de, hate gotin ku Rojava weke hêviyekê tê dîtin û daxwazên rewa yên gelê Kurd tên destekkirin.

Hat ragihandin ku li Elmanyayê hîna 9 aktîvîstên Kurd, bi hinceta maddeya 129b li girtîgehê tên ragirtin.