Li hemberî êrîşên dagirker ên ku di 24’ê Nîsanê de li dijî Herêmên Parastinê yên Medyayê hatibû destpêkirin, çalakiyên ciwanên Kurdistanê didome.

Gelê Kurd saet di 18.00’an de bi banga TCŞ û Meclîsa Gel a Engîn Sîncer a Evryê li pêşiya Navenda Civaka Kurdan a Demokratîk a Evryê kom bûn. Çalakger di nav bajêr de bi pankarta ‘Bijî berxwedana gerîla’meşiyan. Di meşê de posterên Rêberê Gelê Kurd Abdulah Ocalan, alayên TCŞ û PKK’ê hate hildan.

Kesên li derdorê jî bi korneyên wesayîtên xwe piştgirî dan çalakgeran.

Çalakî bi qasî nîv saetê domiya û li qada Grîgny Centreyê mîtîngek hate kirin. Di mîtîngê de Adil Erkek li ser navê Meclîsa Gel a Engîn Sîncer a Evryê axivî û diyar kir ku dewleta Tirk êrîşên xwe yên dagirker roj bi roj zêdetir dike. Erkek bal kişand ser berxwedana gerîla û got “Gerîla li Zap, Metîna û Avaşînê bi fedaiyane li ber xwe dide. Divê berxwedan nebe bi tenê barê gerîlayan û divê gelê Kurd ê li Ewropayê jî piştgiriyê bide têkoşînê.”

Çalakî bi sloganan bi dawî bû.