Fermandariya Giştî ya YPG’ê diyar kir ku di encama çalakiyên bersivdayînê ku 4’ê nîsanê li Qamişloyê piştî êrîşa hêzên rejîmê ya li dijî yekîneya wan, hatin lidarxistin de 6 leşker hatine kuştin, 2 birîndar bûne û 11 jî dîl hatine girtin.

Fermandariya Giştî ya Yekîneyên Parastina Gel (YPG) derbarê êrîşa hêzên rejîma Sûriyeyê ya ku li Qamişloyê li hemberî yekîneya YPG’ê pêk hat û 3 şervanan jiyana xwe ji dest da de daxuyaniyek nû weşand. Di daxuyaniyê de êrîşa duh êvarê hate bibîrxistin û hate destnîşankirin ku dema 3 Endamên Meclîsa Leşkerî ya YPG’ê ya Qamişlo û şervanekî YPG’ê ji karê xwe yê asayî vedigeriyan cihê xwe li Taxa Kornîş rastî êrîşî hêzên dewletê hatine. Di daxuyaniyê de hate gotin ku di encama vê êrîşa xayînane de 3 endamên YPG’ê jiyana xwe ji dest dane û yek jî bi giranî birîndar bûye.

ÇALAKIYÊN BERSIVDAYÎNÊ

Di berdewama daxuyaniyê de hate diyarkirin ku piştî êrîşê hêzên YPG’ê çalakiyên bersivdayînê lidar xistine û ev agahî hatin dayîn: “Piştî vê êrîşa bêbextî ku 3 hevalên me şehîd ketin, hêzên me çalakiyên bersivdayînê li dar xistin. Di vê çarçoveyê de li Çerxerêya Zeytuniyê û noqteya kontrolê ya Neemetiyê çalakî hatin lidarxistin. Di encama çalakiyan de bi giştî 6 leşker hatin kuştin, 2 birîndar bûn û 11 jî dîl hatin girtin .Her wiha noqteya leşkerî jî ket destê YPG’ê.