Projeya Edalet û Heqîqeta Navneteweyî ya ji bo Srî Lankayê (ITJPSL) ku navenda xwe li Başûrê Afrîkayê ye, raporek weşand. Li gorî vê raporê sûcên îşkenceyê yên li hemberî milîtanên Tamîlê yên dîlgirtî, dewam dikin.
Di raporê de cih ji vegotinên şahidan ên li ser navenda îşkenceyê ya li baregeha deryayî ya Hêzên Deryayî yên Srî Lankayê, tê dayîn.
Rapora li ser sûcên îşkence û êrîşên zayendî yên navbera salên 2009-2014'an ên li hemberî gerîlayên Tamîlê, bi serenavê "Şerekî dawî lê nayê: Li Srî Lankayê Îşkence û Şîdeta Zayendî, 2009-2014" hat weşandin.
Li gorî raporê, Tamîliyên di navbera salên 2009-2014'an de li navenda îşkenceyê ya li baregeha li hêzên deryayî ya Trîcomalee hatin ragirtin, bi mehan rastî îşkenceyê hatin. Girtiyên berê ji ITJPSL re axivîn û anîn ziman, cihê ew lê dihatin ragirtin li parêzeran, rêxistinên mafên mirovan û saziyên weke Xaça Sor girtî bû.
Yek ji girtiyên vegotinên wî di raporê de cih girt anî ziman, li cihê îşkence li wan hat kirin şopa xwînê hebû û dengê qîrîniya mehkûman dihate wî. Li gorî raporê, leşkerên Srî Lankayê îşkenceyên gelekî giran ên weke; lêdan, ragirtina bi serberjêrî, şewitandina bi cixareyê, rakirina diran û neynûkan, dikirin.
Di raporê de hat ragihandin, hin girtî jî rastî êrîşa zayendî hatine.
Li gorî vegotinên di rapora ITJPSL de cih girtin, girtiyên Tamîlî yên bi mehan îşkence dîtin, di berdêla bertîl û fîdyeyên ji malbatên wan dihat wergirtin de, bi şertê ku bêdeng bimînin sewqî girtîgehên din dihatin kirin.
