Di hilbijartinên roja 13'ê Adarê li sê eyaletan werin kirin de, tê payîn dengê Demokratên Xiristan di asteke girîng de kêm bibe. Xuya ye ev kêm bûn wê bi kêrî AfD a dijberê Euro were kir, ku ev partî bêhtir bi gotinên nîjadperestî derdikeve pêş.

Li Elmanyayê, ku par zêdeyî 1 mîlyon penaberan xwe lê girtin û 475 hezaran serlêdana penaberiyê kirine, popularîteya Serokwezîr Angela Merkel a ji Partiya Yekîtiya Demokratên Xieristina (CDU) kêm dibe. Merkel û partiya wê bi 'negirtina tedbîrên tund' li hemberî penaberan tên sûcdarkirin. Partiya Alternatîf ji bo Elmanyayê (AfD) a ku bi gotinên nîjadperestî tevdigere, xuya ye ji vê rewşê sûdê werdigire.

CDU û partiya xwişk a li Bavyerayê CSU di hilbijartinên federal ên 2013'an de ji sedî 42 ê dengan stendibûn. Li gorî anketên dawî ev rêje daketiye asta ji sedî 32'an. Asta herî bilind a rêjeya dengan ji bo CDU-CSU ji sedî 37 xuya dike.

Merkel a ku ji bo çareseriya pirsgirêka penaberan bi hikûmeta AKP'ê û Erdogan ên li Kurdistanê komkujiyan dike re tevdigere, di dema dawî de ji ber vê hevkariya xwe rastî rexneyên giran tê. Di serî de televîzyonên dewletê ARD û ZDF di nûçeyên gelek organên medyayê yên Elman de ev hevkarî bi giranî tê rexnekirin.

Ev rewşa Merkel wê di 13'ê Adarê de di hilbijartinên li 3 eyaletên girîng de bêhtir derkeve holê. Ji nava van a herî girîng, hilbijartinên li eyaleta Baden-Wurttembergê ye, ku ev eyalet li gelemperiya Elmanyayê sêyemîn eyaleta herî mezin e.

Li Baden-Wurttembergê, CDU tevî ku di hilbijartinên 2011'an de bû partiya yekemîn jî nebû desthilatdar û nikarîbû pêşî li koalîsyona Keskan û Partiya Sosyal Demokrat (SPD) bigire. Li gorî anketan rêjeya dengê CDU li vê eyaletê daketiye heta rêjeya ji sedî 31'ê. Li vê eyaletê rêjeya dengê AfD a xwedî nêzîkatiya nîjadperest, gihaştiye ji sedî 12'an.

Di anketan de tê texmînkirin ku Kesk wê ji sedî 28, SPD ji sedî 14, FDP ji sedî 5 heta 8'an ê dengan werbigirin. Di rewşeke bi vî rengî de koalîsyonên CDU-FDP û SPD-Kesk nikarin bi tena serê xwe bibin desthilatdar.

Li eyaleta Rheînland-Pflazê jî CDU ji sala 1987'an û vir ve cara yekê ye dibe xwedî şens ku bibe partiay yekemîn. Lê belê li vê eyaletê, li gorî anketan heta mehên havîna par CDU di asta ji sedî 40 ê dengan de bû, niha ji sedî 35 heta 37 xuya dike.

Ji eyaletên rojhilat ku gav bi gav ber di nîjadperestiyê ve diçe Sachsen-Anhaltê jî rewşeke bi heman rengî heye. Li vê eyaletê CDU di sala 2011'an de ji sedî 32,5 ê dengan stendibû. Ev rêje niha ji sedî 32-33 xuya dike. Li vê derê bi awayekî balkêş partiya nîjadperest NPD kêm dike. Rêjeya dengê AfD a di sala 2013'an de ava bû di asta ji sedî 17'an de xuya dike.