Li gelek bajarên Swêdê bi armanca protestokirina çeteyên DAIŞ’ê çalakî pêk hat. Li Gavleyê ev hefteyeke çalakî pêk tên û li Goteborgê bi tevlîbûna 5 hezar kesî çalakiya herî mezin a salên buhrî ya Goteborgê pêk hat. 

STOCKHOLM

Li Stockholmê çalakiya greva birçîbûnê hatibû destpêkirin di roja 3’emîn de li qada Sergel didome. Nûnerên partiyan axivîn û DAIŞ protesto kirin. Bang li NY, YE û hikûmeta Swêdê hat kirin ku mudaxaleyî çeteyên DAIŞ’ê bikin.

Axaftvanan diyar kirin ku divê hikûmeta Swêdê desthilatdariya AKP’ê protesto bikin. Hunermendên Swêdî û Kurdistanî stran ji bo Kobanê gotin.

GOTEBORG

Li Goteborgê jî êrîşên DAIŞ’ê yên li hemberî Kobanê hatin protestokirin.

Nêzî 5 hezar kesî tevlî çalakiyê bûn û li ser navê Navenda Civaka Kurd a Demokratîk Alî Agirî axaftinek kir, û geşedanên dawî yên Kobanê ragihand û got: “Ya girîng ev e ku Kobanê nekeve destê çeteyan. Kobanê ev 28 roj e di bin êrîşan de ye. Êşên mezin dikişînin, mirî û birîndar hene. Divê Her kes ji bo alîkariyê bikeve nava tevgerê.

Her wiha parlamenterê partiya çep û berdevkê polîtîkaya derve Hans Lînde jî axaftin kir. Lînde jî êrîşên li dijî protestoyên li Kurdistan û Tirkiyeyê pêk hatin bi tundî şermezar kir. 

OSTERSUND

Li Ostersundê jî  çalakiyek pêk hat. 150 kes tevlî çalakiyê bûn û  bertek nîşanî welatên ku êrîşên li ser Kobanê temaşe dikin kirin.
Axaftvanan diyar kir ku ji bo pêşîgirtina qirkirinê divê NY û YE demildest bikevin nava tevgerê.

JONKOPÎNG

Li bajarê Jonkopîng jî bi tevlibûna sedan kesî çalakiyek pêk hat û hate xwestin ku hikûmeta Swêd û welatên Rojava mudaxaleyî DAIŞ’ê bikin.

KOPÎNG

Li bajaroka Kopîng jî Kurd ji bo ku çeteyên DAIŞ’ê şermezar bikin daketin qadan. Di axaftinan de hate diyarkirin ku helwesta hêzên koalîsyon û DYA’yê têrî rawestandina êrîşên li hember Kobanê nake û divê NY mudaxaleyî rewşê bike. 

GAVLE

Li bajarê Gavle jî Kurdan çalakiyek girseyî pêk anîn û piştgirî dan berxwedana Kobanê. Li ser banga Navenda Civaka Demokratîk a Kurd li qada Sodermalmstorg  saet di 12.00’an de Kurd hatin cem hev û ber bi navenda bajêr ve meşiyan.

Partiya Karkeran a Demokrat Sosyal, Partiya Keskan û Partiya Çep jî piştgirî dan çalakiyê. 

UMEA

Li bajarê Umea jî Kurd ji bo piştgiriyê bidin gelê Kobanê çalakî pêk anîn. Nêzî 100 kes tevli çalakiyê bûn û Mehrana Bassamî got ku çete tenê êrîşî Kurdan nakin, êrîşê  her kesên ku wek wan nafikirin dikin û ji ber vê jî divê her kes li dijî vê têbikoşe. 

KALMAR

Li qada Larmorge bi tevlîbûna sedan kesî çalakiyek pêk hat û çeteyên DAIŞ’ê hatin şermezarkirin. Li ser navê girseyê endamê Lijneya Rêveberiya Komeleya Çanda Kurd a Kalmar, Ronja Îsmaîl axivî û got: “Îslamger dixwazin li hemû cîhanê xelîfetiyê ava bikin. Ji ber vê ev ne tenê şerê Kurdan şerê hemû cîhanê ye. Divê NY û YE mudaxaleyî çeteyên DAIŞ’ê bikin. 

VAXJO

Li qada Speakers Corner çalakî pêk hat û di axaftinan de hat gotin ku gelê Kobanê bi komkujiyê re rû bi rû ye û ji bo rawestandina komkujiyê bang li sazî û lijneyan hat kirin. 

FALKOPÎNG

Di çalakiya ku li qada navenda bajar pêk hat Kurd û Swêdî axivîn û gotin divê alîkarî ji bo gelê Kobanê û gerîlayên li dijî DAIŞ’ê têdikoşin, bê dayîn û xwestin ku terora li dijî Kurdan bê sekinandin.