Rêxistina El Şebab danê sibehê êrîşî baregeha Yekîtiya Afrîkayê ya li bajarê El Ade yê li herêma Gedo, ku di navbera sînorên Somalî û Kenyayê de ye, kir. Li gorî agahiyan, di destpêka êrîşê de wesayîta bombebarkirî li ber deriyê baregehê hatiye teqandin û dûre endamên rêxistina El Şebab ketine nava bargehê. Rayedarê leşkerî yê Somaliyî Huseyîn Abdulle da xuyakirin, ku şerê li vî baregehî didome û îdîa kir ku zêdeyî 50 leşkerên hêza aştiyê hatine kuştin.

'Berdevkê operasyonên leşkerî' yê El Şebab Şêx Abdîasîs Ebû Mûsab ji Reutersê re axivî û diyar kir ku baregeh ketiye destê wan, leşkerên hêza aştiyê reviyane û herî kêm 63 leşker hatine kuştin.

Mûsab ragihand ku li vî baregehê, di çarçoveya hêza aştiyê de leşkerên Kenyayî wezîfe dikirin.