Li Fransayê, ku ji ber rewşa sekinî ya aboriyê bêkarî gihaşt asta rekorê, di mehên dawî de yekemcar rêjeya bêkariyê kêm bû.

Li gorî hejmarên ji aliyê Saziya Dîtina Kar (Pole-Emploî) ve hatin eşkerekirin, li gorî meha Çileyê li Fransayê hejmara bêkarên li Fransayê bi 28 hezaran kêm bû û daket 3 mîlyon 562 kesan. Li gorî mehek berê bi rêjeya ji sedî 0,8 kêm bû, lê ligorî Çileya 2015'an ji sedî 1,8 zêde bû.

Tevî kategoriyên mirovên bi nîv wextê û li karên demî yên bi desteka dewletê dixebitin re, hejmara bêkaran bi qasî 18 hezarî kêm bû û daket 5 mîlyon 457 hezarî.

Hejmara mirovên demeke dirêj e bêkar in, balê dikişîne. Hînê zêdeyî 800 hezar mirov herî kêm ev 3 sal in bêkar in.

Li Fransayê rêjeya bêkariyê ji sala 2008'an û vir ve her zêde dibe.

Piştî ku rêjeya bêkariyê hat eşkerekirin, Wezîra Xebatê Myrîam El Khomrî daxuyaniyek da û got, 'Divê hejmar bi baldarî were xwendin'. Wezîr El Khomrî da xuyakirin, ku mîna sala 2013'an dibe ku ev hjmara bêkaran ji ber xeteyeke teknîkî bi vî rengî be û ew ê di rojên pêş de mijarê zelal bikin.

Lê belê hin çavdêr dibêjin, polîtîkayên hikûmeta Partiya Sosyalîst (PS) karsazan hîn bêhtir teşwîqî afirandina qadên kar dikin.