Li paytexta Arjantîn Bûenos Aîresê, Komîteya Piştgiriyê ya Arjantîn-Kurdistanê, li ser banga zêdeyî 20 sazî û partiyên siyasî li Meydana Obelîsco bi beşdariya 500 kesî çalakiya 1'ê Mijdarê Roja Kobanê ya Cîhanê lidar xist.

Girseya gel Meydana Obelîsco bi alên KCK, YPG û YPJ'ê xemiland û li ber stranan govend gerand. Di çalakiyê de daxuyaniya KNK'ê ya bi wesîleya Roja Kobanê ya Cîhanê hat xwendin û nûnerên partiyên siyasî peyam dan.

Di daxuyaniya KNK'ê de, der barê Tevgera Azadiyê ya Rojava, piştgirî û korîdora însanî de bal hat kişandin ser astengiyên Tirkiye û hêzên din ên paşverû yên li herêmê.

Di axaftina li ser navê Komîteya Piştgiriyê ya Latîn Amerîka-Kurdistanê de hat gotin, "Berxwedana Kobanê ne tenê berxwedan an jî rizgarkirian bajarekî ye. Divê weke parastinek li hemberî hêzên paşverû û hov ên gef li tevahiya cîhanê dixwarin, êrîşî nirxên gerdûnî dikirin û bi desteka hêzên emperyal teror li hemberî gelan dimeşandin, were fêmkirin."

Hat destnîşankirin ku jin û mêrên li Kobanê û gelemperiya Rojava di vê oxirê de jiyana xwe ji dest dan, ne tenê şehîdên Kurdan e, di heman demê de nirxên şoreşgerî yên tevahiya cîhanê ne.

Çalakî bi stran û gerandina govendê dewam kir.