Li bajarê Hollanda Arnhemê, Leyla Pîşkîn (Jiyanda Xelat) a li Şengalê di dema parastina Kurdên Êzidî ji êrîşên çeteyên DAIŞ'ê de jiyana xwe ji dest da, li gel hevalên xwe Bozan Şêxo (Dara Tolhildan) û Sadî Ozek (Agir Kato) yên li Şengalê jiyana xwe ji dest dan, hat bîranîn.

Xwişka Leyla Pîşkîn Emîne Pîşkîn û kekê wê li merasîma bîranînê behsa jiyana wê, têkoşîna wê û çûyîna wê ya Şengalê kirin. Dan xuyakirin ku malbata wê pê serbilind e û gotin, "Ew şehîda gelê Kurd e." 

Li ser navê KNK'ê Alî Yîgît, nûnerekî ji Komîteya Malbatên Şehîdan a Arhnemê û Serokê Meclîsa Giştî ya Arnhemê li merasîmê axivîn û bi giranî li ser berxwedana Kobanê û hestyariya gelê Kurd a li pêşberî vê berxwedanê rawestiyan. Di axaftinan de hat destnîşankirin ku ew ê xwedî li bîranîna cangoriyan derkevin û hat gotin, "Divê em rola xwe ya li pêşberî pêvajoya dawî ya siyasî, li gorî berxwedana li Kobanê bi rêk û pêk bikin."

Di axaftinan de soza "Em ê têkoşîna şehîdên xwe mezin bikin, bi bîranînên wan re dilsoz bin" hat dubarekirin.

Rojname û qenalên televîzyonê yên çapemeniya Hollanda jî hatin merasîmê û bi malbata Pîşkîn re li ser jiyan û têkoşîna Leyla Pîşkîn hevpeyvîn kirin. Her wiha li ser berxwedana Kurdan a li Şengal û Kobanê jî hevpeyvîn hatin kirin.

Merasîma bîranînê bi xwarinê bi dawî bû.