Ji bo pêşî li kêmbûna buhayê petrolê were girtin, Rûsya û welatên OPEC'ê her di nava hewldanan de ne. Ji bo buha bê zêdekirin, ev welat li ser kêmkirina hilberîna petrolê li hev nakin. Rûsya ku bi biryar e buha zêde bike, di heman demê de hilberîna xwe ya petrolê jî didomîne.

Rûsyayê hilberîna petrolê ya meha Çileyê, li gorî heman dema par ji sedî 1,5 zêde kir û rojane kir 10 mîlyon 878 hezar varîl. Rûsyayê di meha Çileyê de rojane 5 mîlyon 336 hezar varîl îxracata petrolê kir.

Kêmbûna buhayê petrolê ji mehên navîn ên sala 2014'an û vir ve dewam dike. Buhayê varîla petrola Derya Bakur Brent, duh 1,32 Dolar kêm bû û daket binê 32 dolaran.

Ji bo zêdekirina buhayê petrolê, Rûsya bi welatên endamê Rêxistina Welatên Petrolê Îxracat dikin (OPEC) re danûstandinên xwe zêde kir û hewl dide hilberîna petrolê di rêjeyekê de bigire.

Wezîrê Karên Derve yê Rûsyayê bi vê armancê Emaretên Ereb ên Yekbûyî ziyaret kir û Wezîrê Enerjiyê Aleksander Novak jî çû welatekî din ê endamê OPEC'ê Venezûela. Lê belê, tevî van danûstandinên bi welatên endam re hînê hevdîtineke saziyî bi OPEC'ê re ji aliyê Rûsyayê nehatiye plankirin.

EGER RÛSYA Û SIÛDÎ KÊM BIKIN, WÊ ÎRAN JÊ SÛDÊ WERBIGIRE

Rûsya û Erebîstana Siûdî ku serkêşiya hilberîna petrolê dikin, nediyar e ku hilberîna petrolê kêm bikin an na. Li gorî pisporan, kêmkirina hilberîna petrolê ji aliyê her du welatan ve wê bi kêrî îranê were û nayê payîn ku vê gavê hewldaneke bi vî rengî were kirin.