Serdozgeriya Komarê ya Amedê, lêpirsîna xwe ya li ser kuştina nivîskarê Kurd Mûsa Anter temam kir û gilîname amade kir. Di gilînameyê de ji îtirafkar û cerdevanê berê kujer Hamît Yildirim, endamê kontrgerîla Mahmût Yildirim bi navê kod Yeşîl, îtirafkar û endamê berê yê JÎTEM'ê Abdulkadîr Aygan û sûbay Savaş Gevrekçî, cezayê muebbetê yê girankirî û 20 sal cezayê girtîgehê hat xwestin.

Serdozgeriya Komarê ya Amedê, lêpirsîna xwe ya li ser kuştina nivîskarê Kurd Mûsa Anter ku di sala 1992'an de li Amedê hat qetilkirin,  temam kir û gilîname amade kir. Gilîname ji aliyê Cîgiriya Serdozgeriya Komarê ya Amedê, ku bi xala 10 a Kanûna Têkoşîna li dijî Terorê (TMK) wezîfedar e, hat amadekirin û pêşkêşî 7. Dadgeha Cezayê Giran hat kirin. Di gilînameyê de navên Hamît Yildirim ê par li bajarokê Dêrgul ê Şirnexê hat girtin û radestî mehkemeyê hat kirin, Mahmût Yildirim bi navê kod "Yeşîl", Abdulkadîr Aygan ê der heqê wî de ji ber dozeke din biryara girtinê heye û albayê teqawît Savaş Gevrekçî, weke bersûc cih digirin.

Di gilînameyê de, bi maddeyên 450/4 û 149/1 ên TCK bi Hejmara 765'an, der heqe her yek ji bersûcan de cezayê muebbetê yê girankirî û 20 sal cezayê girtîgehê tê xwestin.

7. Dadgeha Cezayê Giran a Amedê, eger piştî lêkolînên xwe gilînameya hatiye amadekirin qebûl bike, wê darizandin destpê bike.

Di gilînameya ji 7. Dadgeha Cezayê Giran a Amedê hat pêşkêşkirin de hat bibîrxistin  ku ji bersûcan Mahmût Yildirim bi navê kod "Yeşîl" û Azîz Tûran di "Doza JÎTEM'ê" ya li 6. Dadgeha Cezayê Giran a Amedê tê dîtin, weke bersûc tên darizandin. Dozgeriyê xwest, gilînameya mijara gotinê bi Doza JÎTEM'ê re bibe yek.