Navenda Çapemeniyê ya YPG'ê da xuyakirin, ku di çarçoveya operasyona li Serêkaniyê de di şerê duh bi şev de 36 çeteyên DAIŞ'ê hatine kuştin û ji ser 3 cenazeyên çeteyan nasnameyên Endonezyayê hatine dîtin. Di şerê duh bi şev de, ku hemû mewziyên çeteyan ên hedef hatin girtin hatin bidestxistin de, 2 şervanên YPG'ê jiyana xwe ji dest dan.

Pêngava YPG/YPJ'ê ya ji aliyê Serêkaniyê ve li dijî çeteyan di 11'ê Cotmehê de hat destpêkirin, gihaşt asteke nû. Di çarçoveya vê operasyonê de li Rawiya, Dehma û li herêmên ser xeta sînor li dijî çeteyan çalakî hatin lidarxistin, xetên parastinê yên çeteyan hatin şikandin û gelek mewziyên çeteyan hatin desteserkirin.

Navenda Çapemeniyê ya YPG'ê bi daxuyaniyeke nivîskî ragihand ku operasyon duh bi şev hemû nuqteyên li Rawiya, Dehma û ser xeta sînor ên hedef hatin girtin, ketin destê hêzên YPG/YPJ'ê.

Hat ragihandin ku di operasyona duh bi şev de 36 kuştiyên çeteyan hatine tespîtkirin û wesayîta leşkerî tevî çeteyên tê de hatiye îmhakirin.

Di daxuyaniyê de ev agahî hat dayîn:

"Hêzên me wesayîtek bi plaqeya Silêmaniye bi tîpa Megzemîn, doçkayek 23 a bi 2 lûleyan, 17 kalaşnîkov, 2 BKC, 3 B7 roket-avêj, demançeyek, 3150 guleyên kalaşnîkovê, 400 zincîrên BKC, 1500 guleyên BKC, 450 guleyên doçka û gelek cebilxaneyên eskerî desteserkirin.

Her wiha 20 kuştiyên çeteyan di destê hêzên me de ne. Ji ser cenazeyê 3 çeteyan jî nasnameyên Endonezya derketin.

Di operasyonê de 2 hevalên me bi ruhekî fedayî çûn bi ser çeteyan de û ji bo serketina vê operasyonê rolek girîng lîstin û bi qehremanî gihîştin şehadetê."