Piştî aloziyên li Til Ebyedê, duh êvarê nûnerên gelê Kurd li Rojava bi rêveberên Ehrar El-Şam re hevdîtin pêk anîn. Civîn bê encam bi dawî bû û li aliyê din jî çekdarên Cebhet El-Nusra 5 ciwanên Kurd li Til Arûs a girêdayî Til Ebyed revandin.

Piştî aloziyên li Til Ebyedê, duh êvarê nûnerên gelê Kurd li Rojava bi rêveberên Ehrar El-Şam re hevdîtin pêk anîn. Di civînê de Dr. Elî Osman, Zeyîm Kurdî, Xalid Bozan Kitî, Îbrahîm Kerdo û Îsmaîl Hec Hemo nûnertiya aliyê Kurd dikirin û rêveberê deriyê sînor ê Til Ebyedê Dr. Hisên Ebû Reyan, berdevkê fermî yê tabûra Ehrar El-Şam ê Til Ebyedê û hin endamên din ên Ehrar El-Şam nûnertiya aliyên din dikirin. 

Hate destnîşan kirin ku, civîn di çarçoveya aştiya navxweyî û jiyana hevbeş de pêk hatiye û hate gotin ku ereb û kurdên herêmê ji mêj ve bi biratî bi hev re jiyan dikin. Di civînê de nûnerên kurdan tekîd kirin ku Mala Gel ne girêdayî tu rêxistinên siyasî û hêzên leşkeriye û gotin ku, biryara girtina Mala Gel ne di cih deye û gotin: ‘’Mala Gel saziyeke civakiye di çarçoveya çareserkirina pirsgirêkên civakê de hatiye vekirin.᾿̓

Nûnerên Kurd di civînê de bal kişandin ser bendên kontrolê ku li ser riyên ketin û derketina bajêr hatine danîn û ragihandin ku, herî dawî çekdarên Cebhet El-Nusra li bajaroka Til Arûs 5 ciwanên Kurd ên sivîl revandine. Di civînê de berdevkê Ehrar El-Şam Hisên Ebû Reyan îdiakir ku haya wî ji bûyerên revandina ciwanên Kurd tuneye û got ger ku peyman bên îmze kirin wê bendên kontrolê werin rakirin.

Komên Çekdar ên Cebhet El-Nusra li bajaroka Til Arûs a ku 2 kîlometre li başûrê Til Ebyede duh di demjimêrên ber êvarê de 5 ciwanên Kurd  dema diçûn ser karê xwe revandin. Li aliyê din jî  bendên kontrolê li hundir û derveyî bajar hatine zêdekirin.

Bê ku civîn bi encam bibe nûnerên kurdan ji civînê derketin, her wiha nûnerên Ehrar El-Şam kurdên li Til Ebyedê jiyan dikin bi alîgiriya bûyerên li Serêkaniyê tewanbar kir û xwestin ku kurdên li Til Ebyedê xwe ji Rojavayê Kurdistanê qut bikin.