Romain Huret, serokê EHESS’ê (École des hautes études en sciences sociales) ya ku li Parîsê ye, bi daxuyaniyeke nivîskî li ser êrişên li ser Rojava axivî û destnîşan kir ku ew ê hevgirtina xwe ya akademîk û saziyî bi zanîngehên Rojava re bidomînin.

EHESS saziyeke navendî û taybet e ku kokên wê digihîje Dibistana Annalesê û li Fransayê û di qada navnetewî warê zanistên civakî de tê naskirin. Sala borî EHESS bi Zanîngeha Bremen û Zanîngeha Rojava re bi hev re dibistana havînê lidar xistibû.

Huret di daxuyaniya xwe de bal kişand ser vê hevkariya akademîk û got ku têkiliyên EHESS’ê bi Rojava re dê bidomin:

“EHESS bi hevkariyên akademîk, xebat û cewherîbûna lêkolîner û xwendekarên xwe ve têkiliyên xwe yên nêzîk bi Rojava re didomîne. Ev hevkariyên di sala 2025’an de bi semînereke lêkolînê ya hevpar û bi Dibistana Havînê ya ku bi Zanîngeha Bremen û Zanîngeha Rojava re di navbera 2025-2026’an de were lidarxistin, dîsa xwe nîşan didin.”

ÊRIŞ HERÊMÊ DÎSA DI BIN XETEREYA TUNDIYÊ DE DIHÊLIN

Huret di daxuyaniya xwe de behsa çavkaniya êrişên li ser Rojava jî kir û wiha got: 

“Di hefteyên dawî de êrişên bêrehm ên artêşa Sûriyeyê û leşkerên bi pere yên piştgiriya dewleta Tirk digirin, herêm careke din xistine ber devê tundiya girseyî.”

Serokê EHESS’ê Huret di berdewamiya daxuyaniya xwe de bang kir û wiha got: 

“Li hember vê rewşê EHESS careke din hevgirtina xwe ya bêguman bi zanîngehên Rojava re piştrast dike û bang li demildest parastina nifûsa sivîl û saziyên perwerde û akademîk dike.”