Bi pêşengiya Komeleya Alîkarî û Piştevaniya bi Malbatên Xizmên Xwe Winda Kirine ya Behra Spî (AYKAYDER), bi boneya Cejna Qurbanê gorên şehîdan ên li goristanên Kuçukoba, Asrî, Bûrûk, Akkapî, Ceyhan Asrî û Mûtlû yên li navçeyên Seyhan, Ceyhan û û Yuregîrê hatin ziyaretkirin. Parlamentera Partiya Demokratîk a Gelan (HDP) ya Edeneyê Tûlay Hatîmogûllari, rêveberên HDP'ê yên bajar û navçeyan ên Edeneyê, Meclîsa Dayikên Aştiyê û gelek kes tevlî serdanê bûn. Di çalakiyê de li goristanan gul hatin danîn û dua hatin xwendin.

Girse destpêkê Goristana Kuçukoba ya li Taxa Seyhanê ziyaret kir. Di serdanê de girseyê deqeyek rêz girt û gelek caran dirûşmeyên “Şehîd namirin” berz kirin.

Her wiha gorên xebatkarên çapemeniya azad Kadrî Bagdû, Metîn Alataş û Volkan Eryîgît hatin ziyaretkirin. Di axaftinên di serdanan de hatin kirin de hat diyarkirin ku ew ê bibin pêşengê têkoşîna yên jiyana xwe ji dest dane.

MERSÎN

Li Mêrsînê jî bi pêşengiya AYKAYDER'ê serdana gorên şehîdan hat kirin. Meclîsa Dayikên Aştiyê ya Mêrsînê, TJA, DBP, HDP, TÛAY-DER şaxa Çukurovayê û malbat tevlî serdana Goristana Guneykentê ya navçeya Toroslarê bûn. Li ser gora yek ji 3 jinên siyasetmedar ên Kurd ên li Parîsê hatin qetilkirin Leyla Şaylemez deqeyek rêz hate girtin. Girse gorên din ziyaret kirin û gul danîn ser goran.

WAN

Bi pêşengiya rêxistinên Partiya Demokratîk a Gelan (HDP) ya Wanê û navçeyên wê, Rêxistinên Herêmên Demokratîk (DBP), Komeleya Alîkarî û Piştevaniyê ya bi Malbatên Girtî û Hikûmxwaran re (TÛHAYDER) Şaxa Wanê, Komeleya Alîkariyê ya bi Malbatên Xizmên Xwe li Dergûşa Şaristaniyan de Wenda Kirine (MEBYA-DER), Tevgera Jinên Azad (TJA) û rêveberên Kongreya Civaka Demokratîk (DTK), goristanên Selîmbey, Karşiyaka û Yalim Erez hatin ziyaretkirin. Hevseroka MEBYA-DER’ê Xanim Kaya got, “Heta dilopa xwîna xwe ya dawî em li cem kesên ku di têkoşîna demokrasiyê de şehîd bûne û malbatên wan bin.”

ŞIRNEX

Li navçeya Cizîrê ya Şirnexê di pêşengiya MEBYA-DER'ê de serdana goristanê pêk hat. MEBYA-DER, Meclîsa Dayikên Aştiyê, Parlamentera Partiya Demokratîk a Gelan (HDP) ya Şirnexê Nûran Îmîr, Rêxistina HDP'ê ya navçeya Cizîrê û gelek kes tevlî serdana goristanê bûn.

Destpêkê Goristana Asrî ya Cizîrê ku gorên gerîlayên di têkoşîna azadiyê de şehîd bûne, lê ne hat ziyaretkirin.

Piştre derbasî goristana Banê Senefîsê bûn. Li vir gorên şehîdan jî hatin ziyaretkirin. Bername bi duayên ku li ser goran hatin xwendin bi dawî bû.

MÊRDÎN

Li navend û navçeyên Mêrdînê ji aliyê HDP, Partiya Herêmên Demokratîk (DBP) û MEBYADER'ê ve goristan hatin ziyaretkirin. Di serdanên goristanê de ku Parlamentera HDP'ê ya Mêrdînê Pero Dundar jî amade bû dua hatin xwendin. Gorên kesên di têkoşîna azadiyê ya Kurdistanê de şehîd bûne, lê ji ber ku DNA’ya wan bi encam nebûne li Goristana Bêkesan a li navçeya Artûklûyê hatine veşartin. Girse serdana vê goristanê jî kir.